काठमाडौं । काठमाडौंका विभिन्न स्थानमा अनुमति बिना लुकिछिपी बस्दै आएका पाँच जना बंगलादेशी नागरिकलाई सशस्त्र प्रहरीले पक्राउ गरेको छ। उनीहरूको साथबाट नौ जना बंगलादेशी नागरिकका १४ थान राहदानी तथा ठूलो आर्थिक कारोबारको विवरण उल्लेख गरिएका दुई थान डायरी बरामद भएपछि घटनामाथि थप अनुसन्धान अघि बढाइएको छ।
सशस्त्र प्रहरी बलको एपीएफ इन्टेलिजेन्स ब्यूरो र नं. १८ गणको संयुक्त टोलीले सोमबार साँझ उनीहरूलाई नियन्त्रणमा लिएको हो। पक्राउ पर्नेमा मोहम्मद कुर्वान अलि, जाहिंगिर आलम, रोनित रोय चौधरी, अकम अब्ल्लाह र बंगलादेशी मूलका ब्राजिलियन नागरिक रफत मिहा रहेका छन्।
सशस्त्र प्रहरीका सहप्रवक्ता डीएसपी शैलेन्द्र थापाका अनुसार रोनित रोय चौधरी बस्दै आएको कोठामा खानतलासी गर्दा नौ जना बंगलादेशी नागरिकका १४ थान राहदानी फेला परेका थिए। त्यसैगरी, ठूलो परिमाणमा आर्थिक कारोबार भएको विवरण उल्लेख गरिएका दुई थान डायरीसमेत बरामद गरिएको छ।
पक्राउ परेका जाहिंगिर आलमविरुद्ध एक जना बंगलादेशी नागरिकलाई अपहरण गरी बन्धक बनाएको आरोपमा काठमाडौं जिल्ला अदालतमा मुद्दासमेत विचाराधीन रहेको खुलेको छ।
प्रहरीले पक्राउ परेका पाँचै जनालाई आवश्यक अनुसन्धान तथा कारबाहीका लागि अध्यागमन विभागको जिम्मा लगाएको छ। बरामद राहदानी, आर्थिक कारोबारका विवरण तथा उनीहरूको गतिविधिबारे थप अनुसन्धान भइरहेको सशस्त्र प्रहरीले जनाएको छ।
अनुमतिबिना बसोबास, एकै कोठाबाट धेरै व्यक्तिका राहदानी बरामद र अपहरणसम्बन्धी मुद्दासमेत जोडिएपछि यो घटनालाई सुरक्षा निकायले गम्भीर रूपमा लिएको छ।
