दाङ । लुम्बिनी प्रदेश सरकारले अन्धोपन तथा दृष्टिदोष न्यूनीकरणका लागि आँखा स्वास्थ्य सेवालाई प्राथमिकतामा राख्दै लगानी बढाउने भएको छ ।
लुम्बिनी प्रदेशका मुख्यमन्त्री चेतनारायण आचार्यले आँखा उपचार सेवाको पहुँच सबै नागरिकसम्म पुर्याउन प्रदेश सरकारले योजनाबद्ध रूपमा काम गर्ने बताएका छन् । नेपाल नेत्रज्योति सङ्घले सोमबार लमहीमा आयोजना गरेको आँखा स्वास्थ्य सेवा तथा कार्बन उत्सर्जनसम्बन्धी अध्ययन प्रतिवेदन सार्वजनिक कार्यक्रममा उनले यस्तो प्रतिबद्धता जनाएका हुन् ।
मुख्यमन्त्री आचार्यले सङ्घले तयार पारेको पाँचवर्षे रणनीतिक योजना कार्यान्वयनलाई समेत प्रदेश सरकारले प्राथमिकता दिने बताए । ग्रामीण तथा विपन्न समुदायसम्म गुणस्तरीय आँखा उपचार सेवा विस्तार गर्न आवश्यक लगानी र कार्यक्रम अघि बढाइने उनको भनाइ थियो ।
नेपाल नेत्रज्योति सङ्घको अध्ययनअनुसार लुम्बिनी प्रदेशमा ५० वर्ष वा सोभन्दा माथिका १३ हजार ९४ जना अन्धोपनबाट प्रभावित छन् । यस उमेर समूहमा दुवै आँखाको अन्धोपनको दर १.७ प्रतिशत रहेको छ । त्यस्तै, ६/१२ भन्दा कम दृश्य तीक्ष्णता भएका दुई लाख सात हजार ९५७ जना रहेका छन् ।
अध्ययनले विशेषगरी ग्रामीण तथा विपन्न समुदायमा आँखा उपचार सेवाको पहुँच असमान रहेको देखाएको छ । दक्ष जनशक्तिको अभाव र उपचारपछि बिरामीको नियमित अनुगमन गर्ने प्रणाली कमजोर हुनु पनि प्रमुख चुनौतीका रूपमा औँल्याइएको छ ।
यसैगरी, लुम्बिनी प्रदेशका पाँच र कर्णाली प्रदेशको एक गरी छ वटा अस्पतालमा गरिएको कार्बन उत्सर्जनसम्बन्धी अध्ययनले अस्पताललाई वातावरणमैत्री बनाउन बायोग्यास, इन्डक्सन र सौर्य ऊर्जाको प्रयोग बढाउन सुझाव दिएको छ ।
अध्ययनले एकातिर आँखा उपचार सेवाको पहुँच र गुणस्तर विस्तार गर्नुपर्ने आवश्यकता औँल्याएको छ भने अर्कोतर्फ स्वास्थ्य संस्थालाई वातावरणमैत्री बनाउने दिशामा पनि ध्यान दिनुपर्ने देखाएको छ ।
