दाङ । स्वास्थ्य तथा खाद्य स्वच्छतामन्त्री निशा मेहताले दाङको लमहीमा निर्माणाधीन प्रादेशिकस्तरको ट्रमा सेन्टर सञ्चालनका सम्बन्धमा छिट्टै निर्णय गरिने बताएकी छन्। बिहीबार निर्माणाधीन ट्रमा सेन्टरको निरीक्षण गर्दै मन्त्री मेहताले निर्माण सम्पन्न भएपछि उपचार सेवा सञ्चालन गर्ने विषयमा आवश्यक निर्णय लिइने बताएकी हुन्।
करिब २२ करोड रुपैयाँ लागतमा निर्माण भइरहेको ट्रमा सेन्टरको भौतिक प्रगति हालसम्म ७४ प्रतिशत पुगेको छ। चालु आर्थिक वर्षभित्रै भौतिक संरचना निर्माण सम्पन्न गर्ने तयारी गरिएको छ। ट्रमा सेन्टर सञ्चालनमा आएपछि दुर्घटनामा परेका तथा आकस्मिक उपचार आवश्यक पर्ने बिरामीलाई विशेषज्ञ सेवा उपलब्ध गराउने अपेक्षा गरिएको छ।
ट्रमा सेन्टरको निर्माण सम्पन्न भएपछि उपचार सेवा सञ्चालनका लागि संघीय सरकारले आवश्यक निर्णय गर्नुपर्ने भन्दै लुम्बिनी प्रदेश सरकारले ध्यानाकर्षण गराएको छ। प्रदेशका स्वास्थ्यमन्त्री दीपेन्द्र पुनसहित मन्त्रालयका सम्बन्धित अधिकारीहरूले ट्रमा सेन्टर सञ्चालनको प्रक्रिया अघि बढाउन संघीय सरकारको ध्यानाकर्षण गराएका हुन्।
स्वास्थ्य तथा खाद्य स्वच्छता मन्त्रालयका सचिव डा. विकास देवकोटाले लुम्बिनी प्रदेशको राजधानी क्षेत्रका अस्पताललाई विशिष्टीकृत स्वास्थ्य सेवा प्रदान गर्ने संस्थाका रूपमा विकास गर्न पहल भइरहेको बताए।
यसैबीच मन्त्री मेहताले बिहीबार नै लमही अस्पतालको समेत निरीक्षण गरेकी छन्। निर्माणाधीन ट्रमा सेन्टरको संरचना पूरा गरी सञ्चालनमा ल्याउन आवश्यक निर्णय र व्यवस्थापनको प्रक्रिया अघि बढेमा दाङसहित आसपासका जिल्लाका नागरिकलाई आकस्मिक तथा विशेषज्ञ उपचार सेवा उपलब्ध गराउने बाटो खुल्नेछ।
