काठमाडौं । नागढुंगा सुरुङमार्ग प्रयोग गर्ने सवारीसाधनले आगामी कात्तिक १५ गतेदेखि सडक उपभोग शुल्क तिर्नुपर्ने भएको छ। नागढुंगा सुरुङमार्ग निर्माण आयोजनाले सूचना जारी गर्दै सवारीसाधनको वर्गअनुसार शुल्क लिने जानकारी गराएको हो। सडक बोर्ड नेपालको कार्यकारी समितिको असोज १२ गतेको निर्णय तथा नेपाल राजपत्रमा २०८२ चैत २६ गते प्रकाशित सूचनाअनुसार शुल्क निर्धारण गरिएको हो।
आयोजनाका अनुसार वर्ग १ मा पर्ने कार, भ्यान, पिकअप, ट्याक्टर, माइक्रोबस तथा अन्य हलुका सवारीसाधनले काठमाडौं प्रवेश गर्दा ६५ रुपैयाँ र काठमाडौंबाट बाहिरिँदा ६० रुपैयाँ तिर्नुपर्नेछ। त्यस्तै, वर्ग २ मा पर्ने मिनी बस, मिनी टिपर तथा मिनी ट्रकले काठमाडौं प्रवेश गर्दा ११५ रुपैयाँ र बाहिरिँदा ८० रुपैयाँ शुल्क बुझाउनुपर्नेछ।
वर्ग ३ मा पर्ने बस तथा ट्रकले काठमाडौं प्रवेश गर्दा २६० रुपैयाँ र काठमाडौंबाट बाहिरिँदा २०० रुपैयाँ तिर्नुपर्नेछ। यसैगरी, वर्ग ४ मा पर्ने मल्टी एक्सल ट्रक, मल्टी एक्सल सवारीसाधन तथा भारी उपकरणले काठमाडौं प्रवेश गर्दा ६०० रुपैयाँ र बाहिरिँदा २५० रुपैयाँ शुल्क बुझाउनुपर्ने व्यवस्था गरिएको छ।
नागढुंगा सुरुङमार्ग प्रयोग गरेबापत शुल्क लागू भएसँगै सवारीसाधनको वर्ग र यात्राको दिशाअनुसार फरक रकम तिर्नुपर्नेछ। सुरुङमार्ग प्रयोग गर्ने चालक तथा यातायात व्यवसायीले निर्धारित शुल्कबारे जानकारी लिएर यात्रा गर्नुपर्नेछ।
