काठमाडौं । नेपाल विद्युत् प्राधिकरणले काठमाडौंका विभिन्न क्षेत्रमा भूमिगत विद्युत् प्रसारण लाइन विस्तार तथा व्यवस्थापनको काम गर्ने भएपछि आठ दिनसम्म विद्युत् आपूर्ति बन्द गर्ने भएको छ।
प्राधिकरणका अनुसार कुलेश्वर र बानेश्वर वितरण केन्द्रअन्तर्गतका विभिन्न फिडरमा काम गर्न आजदेखि आगामी २० कात्तिकसम्म विद्युत् कटौती गरिनेछ। निर्धारित तालिकाअनुसार बिहान १०ः३० बजेदेखि दिउँसो ४ बजेसम्म विद्युत् आपूर्ति बन्द हुनेछ।
प्राधिकरणले सार्वजनिक गरेको तालिकाअनुसार १३ कात्तिकमा हाइभिजन कोलोनी क्षेत्रमा विद्युत् अवरुद्ध हुनेछ। त्यस्तै, १४ र १६ कात्तिकमा कलंकी–स्युचाटार क्षेत्रमा तथा १५ कात्तिकमा कलंकी चोकदेखि ढुंगेअड्डासम्म विद्युत् आपूर्ति बन्द हुनेछ।
यसैगरी, १७ कात्तिकमा युएनपार्कदेखि बिजुलीबजारसम्म, १८ र २० कात्तिकमा धौलागिरि आवास तथा मातातीर्थ पीएसएस क्षेत्रमा र १९ कात्तिकमा हाजमा पुल क्षेत्रमा विद्युत् कटौती हुने प्राधिकरणले जनाएको छ।
भूमिगत विद्युत् लाइन विस्तारको कामलाई व्यवस्थित र प्रभावकारी बनाउन विद्युत् आपूर्ति बन्द गर्न लागिएको प्राधिकरणको भनाइ छ।
यद्यपि, मौसम प्रतिकूल भएमा निर्धारित कार्यतालिका परिवर्तन हुन सक्ने प्राधिकरणले स्पष्ट पारेको छ। विद्युत् कटौतीबाट दैनिक जनजीवन तथा व्यावसायिक गतिविधिमा असर पर्न सक्ने भएकाले आवश्यक पूर्वतयारी गर्न उपभोक्तालाई प्राधिकरणले आग्रह गरेको छ।
