परासी । पश्चिम नवलपरासीको रामग्राम नगरपालिका–२ स्थित सेतो पुलमा ट्रकको ठक्करबाट मोटरसाइकल चालकको मृत्यु भएको छ।
बुधबार दिउँसो हुलाकी सडकखण्डमा भएको दुर्घटनामा रुपन्देहीको तिलोत्तमा नगरपालिका–१३, भलवारी निवासी अन्दाजी ४० देखि ५० वर्षीय पोषकान्त पोखरेलको मृत्यु भएको हो।
प्रहरीका अनुसार दिउँसो करिब १२ः१० बजे पश्चिमबाट पूर्वतर्फ जाँदै गरेको सुदूरपश्चिम प्रदेश ०१–००१ ख ३४९७ नम्बरको ट्रकले सोही दिशातर्फ गइरहेको लुम्बिनी प्रदेश ०१–००९ प ९६१९ नम्बरको मोटरसाइकललाई ठक्कर दिएको थियो।
ट्रकको ठक्करबाट गम्भीर घाइते भएका पोखरेललाई तत्काल उपचारका लागि जिल्ला अस्पताल परासी पुर्याइएको थियो। तर, चिकित्सकले दिउँसो १२ः२० बजे नै उहाँलाई मृत घोषणा गरेका थिए।
दुर्घटनापछि प्रहरीले ट्रक, ट्रक चालक २६ वर्षीय बन्धु राना र मोटरसाइकललाई नियन्त्रणमा लिएको छ। घटनाबारे थप अनुसन्धान भइरहेको जिल्ला प्रहरी कार्यालय पश्चिम नवलपरासीले जनाएको छ।
