काभ्रे । काभ्रेको रोशी गाउँपालिकाका दुई स्थानमा पहिरो खसेपछि बीपी राजमार्ग पूर्ण रूपमा अवरुद्ध भएको छ। पहिरोका कारण राजमार्गमा सवारी आवागमन ठप्प हुँदा यात्रुहरू अलपत्र पर्ने अवस्था सिर्जना भएको छ।
जिल्ला प्रहरी कार्यालय काभ्रेका अनुसार रोशी गाउँपालिका–९ पिन्थली र रोशी गाउँपालिका–८ गिम्दीबेँसीमा पहिरो खसेपछि राजमार्ग अवरुद्ध भएको हो।
लगातार वर्षा भइरहेकाले तत्काल पहिरो पन्छाएर सडक सञ्चालनमा ल्याउन कठिन हुने प्रहरीले जनाएको छ। जिल्ला प्रहरी कार्यालयका सूचना अधिकारी रविन विष्टले वर्षा जारी रहेकाले सडक खुलाउन सहज नहुने जानकारी दिए।
उनले राजमार्गको पछिल्लो अवस्था बुझेर मात्रै यात्रा गर्न सर्वसाधारणलाई आग्रह गरेका छन्।
पहिरोका कारण बीपी राजमार्ग हुँदै आवतजावत गर्ने सवारीसाधन प्रभावित भएका छन्। प्रहरीले सडकको अवस्था सामान्य नभएसम्म जोखिम मोलेर यात्रा नगर्न अनुरोध गरेको छ।
