काठमाडौं । नागढुङ्गा सुरुङमार्ग प्रयोग गर्ने सवारीसाधनबाट आज (कात्तिक १५) देखि सडक दस्तुर संकलन सुरु गरिएको छ। आइतबार राति १२ बजेदेखि लागू हुने गरी सुरुङमार्ग भएर काठमाडौं भित्रिने तथा बाहिरिने सवारीसाधनले निर्धारित दरअनुसार शुल्क तिर्नुपर्ने व्यवस्था गरिएको हो।
नागढुङ्गा सुरुङमार्ग आयोजना प्रमुख इन्जिनियर सौजन्य नेपालका अनुसार सुरुङमार्ग प्रयोग गर्ने सबै प्रकारका सवारीसाधनबाट नेपाल राजपत्रमा प्रकाशित दररेटअनुसार दस्तुर संकलन गरिनेछ।
निर्धारित शुल्कअनुसार साना कार, जिप, भ्यान तथा माइक्रोबसले काठमाडौं प्रवेश गर्दा ६५ रुपैयाँ र काठमाडौं बाहिरिँदा ६० रुपैयाँ तिर्नुपर्नेछ। त्यस्तै, ठूला सवारीसाधनले सुरुङमार्ग प्रवेश गर्दा ६०० रुपैयाँ र बाहिरिँदा २५० रुपैयाँ दस्तुर बुझाउनुपर्नेछ।
सुरुवाती चरणमा शुल्क भुक्तानीका लागि नगद र क्यूआर कोडको व्यवस्था गरिएको छ। आगामी दिनमा भने आरएफआईडी कार्ड तथा ट्याग प्रणाली लागू गरी स्वचालित रूपमा दस्तुर संकलन गर्ने तयारी गरिएको आयोजना प्रमुख नेपालले बताएका छन्।
सुरुङमार्गमा खटिएका सेवा प्रदायकका कर्मचारीले सवारीसाधनबाट शुल्क संकलन गर्नेछन्। यसरी संकलित रकम सडक बोर्ड नेपालको खातामा जम्मा हुनेछ। दस्तुर संकलनको सञ्चालन तथा अनुगमनको जिम्मेवारी सडक बोर्ड नेपाल र सडक विभागले पाएका छन्।
दस्तुर संकलन सुरु भएसँगै नागढुङ्गा सुरुङमार्ग प्रयोग गर्ने यात्रु तथा सवारीधनीले अब यात्रा गर्दा निर्धारित शुल्कसमेतको व्यवस्था गर्नुपर्ने भएको छ।
