काठमाडौं । प्रधानमन्त्री वालेन्द्र शाह (बालेन) को सम्भावित भारत भ्रमणको तयारी र त्यसका एजेन्डा तय गर्न भारतका विदेश सचिव विक्रम मिश्री दुईदिने औपचारिक भ्रमणका लागि बुधबार काठमाडौं आइपुगेका छन् ।
परराष्ट्र सचिव अमृतबहादुर राईको निमन्त्रणामा नेपाल आएका मिश्रीले आज र भोलि नेपालका उच्चपदस्थ अधिकारीहरूसँग भेटवार्ता तथा द्विपक्षीय छलफल गर्ने कार्यक्रम रहेको छ ।
भ्रमणका क्रममा परराष्ट्र सचिव राई र भारतीय विदेश सचिव मिश्रीबीच औपचारिक द्विपक्षीय वार्ता हुनेछ । उक्त वार्तामा प्रधानमन्त्री बालेनको सम्भावित भारत भ्रमण, भ्रमणका एजेन्डा तथा नेपाल–भारत सम्बन्धका विविध पक्षमा छलफल हुने अपेक्षा गरिएको छ ।
परराष्ट्र मन्त्रालयका अनुसार वार्तामा दुई देशबीचको घनिष्ठ तथा मैत्रीपूर्ण सम्बन्धलाई थप सुदृढ बनाउने, आपसी हित र चासोका विषयमा सहकार्य विस्तार गर्ने तथा द्विपक्षीय सम्बन्धको समग्र अवस्थाबारे समीक्षा गरिनेछ ।
यसका अतिरिक्त विदेश सचिव मिश्रीले नेपालका उच्चपदस्थ सरकारी अधिकारी तथा विशिष्ट व्यक्तिहरूसँग शिष्टाचार भेटवार्तासमेत गर्ने कार्यक्रम छ ।
भारतीय विदेश सचिवको यो भ्रमणलाई प्रधानमन्त्री बालेनको सम्भावित भारत भ्रमणको तयारी र दुई देशबीच उच्चस्तरीय संवाद अघि बढाउने महत्त्वपूर्ण कूटनीतिक पहलका रूपमा हेरिएको छ ।
