काठमाण्डौँ । राष्ट्रिय सतर्कता केन्द्रले कार्यालय आएर हाजिर गरेर फर्कने गरेको गुनासो आएपछि सिंहदरबारमा आकस्मीक अनुगमन गरेको छ ।
बिहीबार अनुगमन टोलीले सिंहदरबारका सवै गेटमा बसेर सिंहदरबारबाट बाहिरिने कर्मचारीसंग सोधपुछ गरेर आवश्यक रेकर्ड राखेको थियो । सिंहदरबारभित्र काम गर्ने कर्मचारीले बिहान कार्यालय प्रवेश गरेर हाजीर गरेर बाहिरिने र अपरान्ह पुन हाजिर गर्नका लागि मात्रै जाने गरेको गुनासो आएपछि अनुगमन गरिएको केन्द्रले जनाएको हो ।
अनुगमनका क्रममा सवैको रेकर्ड राखिएको र त्यसलाई अध्ययन गरेपछि सम्बन्धीत मन्त्रालयमा लेखेर पठाइने केन्द्रका अधिकारीहरुले जनाएका छन् । अनुगमनका क्रममा बाहिरिने कर्मचारीहरुले अस्पताल जान लागेको, खाना खान जान लागेको, चिठि पुराउन जान लागेको लगाएतका विवरण टिपाएका थिए ।
