एजेन्सी - फिलिपिन्सले औपचारिक रूपमा दक्षिण चीन सागरको विस्तृत महाद्विपीय क्षेत्रमा आफ्नो दाबी गरेको छ ।
फिलिपिन्सले दक्षिण चीन सागरको महाद्विपीय क्षेत्र आफ्नो रहेको भन्दै संयुक्त राष्ट्र सङ्घमा औपचारिक रूपमा दर्ता गरेको फिलिपिन्सको विदेश मन्त्रालयले जनाएको छ ।
यो क्षेत्रमा विशेष अधिकार सुरक्षित गरेर त्यहाँका प्राकृतिक स्रोतहरूको दोहन गर्ने उद्देश्यले फिलिपिन्स अघि बढेको बताइएको छ ।
यस क्षेत्रमा फिलिपिन्स र चीनबीचको विवाद निरन्तर बढ्दै गएको अन्तर्राष्ट्रिय समाचार संस्था अलजजिराले जनाएको छ । चीनले दक्षिण चीन सागरको अधिकांश भूभागमा आफ्नो दाबी गर्दै आएको छ ।
पछिल्लो समय चीनले आफ्नो तटरक्षक बलहरूलाई यो क्षेत्रमा शंकास्पद रुपमा भेटिएका जोकोही विदेशीलाई बिना कुनै परीक्षण ६० दिनसम्म हिरासतमा राख्ने अधिकार दिएको छ । चीनले दक्षिण चीन सागरका धेरै चट्टानहरूलाई सैन्य प्रयोगका लागि कृत्रिम टापुमा परिणत गरेको छ ।
