काठमाडौं।असार महिनाको पहिलो साता शेयर बजारका लागि सुखद रहेन । साताभरमा नेपाल स्टक एक्सजेञ्ज (नेप्से) ४२.९८ अङ्कले घट्यो ।
गत साताको अन्तिम कारोबार दिन बिहीबार २१११.२९ अङ्कमा रहेको नेप्से परिसूचक यो साताको बिहीबारसम्म आउँदा २०६८.३१ विन्दुमा झरेको हो ।
यो साता नेप्सेमा ४ दिनमात्र कारोबार भयो । ३ दिन बजार घट्यो भने एक दिन झिनो अङ्कले बढ्यो । सोमबार बकर इदका दिन सार्वजनिक बिदा हुँदा शेयर बजार बन्द रह्यो ।
४ दिनको कारोबारमा नेप्से ४२ अङ्कले घट्ता दैनिक औसत १०.७४५ अङ्कले घटेको छ । यो साता कारोबार अङ्क भने सकारात्मक देखिएको छ । ४ दिनमा १६ अर्ब ६७ करोड ६ लाख ८९ हजार रुपैयाँको शेयर कारोबार भएको छ । सातामा दैनिक औसत ४ अर्ब १६ करोड ७६ लाख ७२ हजार रुपैयाँको कारोबार भएको हो ।
यो साता ४ दिन अवधिमा ३ अर्ब ६१ करोड ७७ लाख ५९४ कित्ता शेयर किनबेच भएको छ । दैनिक औसत ९० लाख ४४ हजार ३९८ कित्ता शेयर कारोबार भएको छ ।
सातामा जम्मा २ लाख ३० हजार २३ पटक शेयर किनबेच भएको छ । ४ दिनमा औसत दैनिक ५७ हजार ५०६ पटक शेयर किनबेच भएको छ ।
कुन दिन कस्तो रह्यो बजार ?
असारको पहिलो साताको पहिलो दिन २ गते आइतबार नेप्से १७ अङ्कले घटेको थियो । सो दिन १७.०४ अङ्कले घटेर २०९५.२५ विन्दुमा बन्द भएको नेप्से परिसूचक उच्चतम् २११७.१५ र न्यूनतम २०९०.१३ विन्दुमा पुगेको थियो।
आइतबार ५ अर्ब रुपैयाँभन्दा बढीको कारोबार हुँदा बजारमा उत्साह देखियो । बजार बन्द हुँदासम्ममा ५ अर्ब ४२ करोड २३ लाख ५६ हजार रुपैयाँको १ करोड २४ लाख ३३ हजार ८४६ कित्ता शेयर ७१ हजार ४८१ पटक किनबेच भएको थियो ।
सोमबार बकर इद परेकाले सार्वजनिक बिदा हुँदा नेप्से समेत बन्द भयो । नेप्से बन्द भएकाले उक्त दिन शेयर कारोबार भएन । तर, मंगलबार नेप्से कारोबार हुँदा घट्ने क्रम भने जारी रह्यो । मंगलबार नेप्से १८.७६ अङ्कले घटेर २०७६.४९ विन्दुमा झर्यो ।
मंगलबार नेप्से ०.८९ प्रतिशतले घट्दा परिसूचक उच्चतम् २११७.१५ र न्यूनतम २०७३.९१ विन्दु रह्यो । आइतबारको तुलनामा कारोबारमा भने भारी मात्रामा गिरावट आयो ।
आइतबार ५ अर्ब रुपैयाँ बढीको कारोबार भएकोमा मंगलबार भने ४ अर्ब रुपैयाँमै सीमित रह्यो । मंगलबार ४ अर्ब ३ करोड ६९ लाख १० हजार रुपैयाँ बराबरको ८९ लाख १२ हजार ३३० कित्ता शेयर ५७ हजार ६३२ पटक किनबेच भयो ।
आइतबार र मंगलबार लगातार २ कारोबार दिन नेप्से दोहोरो अङ्कले घट्दा बुधबार भने झिनो अङ्कको नेप्सेमा करेक्सन देखियो । अन्तिम २ मिनेटमा नेप्से १.२७ अङ्कले बढ्यो ।
बुधबार नेप्से परिसूचक उच्चतम २०८६.८५ विन्दु र न्यूनतम २०७३.३४ विन्दुसम्म पुग्यो । मंगलबारको तुलनामा बुधबार पनि कारोबार १ अर्ब रुपैयाँले घट्यो । बुधबार ३ अर्ब ३६ करोड ६९ लाख ८ हजार रुपैयाँ बराबरको ६८ लाख ३२ हजार ५५० कित्ता शेयर ४८ हजार ३४४ पटक किनबेच भयो ।
नेप्सेको वियर ट्रेन्ड साताको अन्तिम कारोबारको दिन पनि जारी रह्यो । बिहीबार नेप्सेमा दोहोरो अङ्कको गिरावट आयो । बिहीबार नेप्से १०.४४ अङ्कले घटेर २०६८.३१ विन्दुमा पुग्यो ।
बिहीबार नेप्से परिसूचक उच्चतम २०८६.८५ र न्यूनतम २०६३.९० विन्दुमा पुगेको थियो । बिहीबार ३ अर्ब ८७ करोड ७ लाख ४४ हजार रुपैयाँको ८६ लाख ६३ हजार ६९९ कित्ता शेयर ५३ हजार १७ पटक किनबेच भएको छ।
