काठमाडौँ । सुनको मुल्यले आज फेरि नयाँ रेकर्ड बनाएको छ ।
सुनको मुल्य तीन सय रुपैयाँले बढेर अहिलेसम्मकै उच्च तोलाको एक लाख ६५ हजार नौ सय रुपैयाँ पुगेको नेपाल सुनचाँदी व्यवसायी महासङ्घले जनाएको छ । हिजो पनि एकैदिन ६ सय रुपैयाँले बढेर सुनको मुल्यमा कीर्तिमान बनेको थियो ।
दशैँ बिदापछि सुनको मुल्य लगातार बढिरहेको छ । दशैँ बिदापछिको पहिलो दिन एक हजार चार सयले बढेर तोलाको एक लाख ६० हजार पाँच सय रुपैयाँ पुगेको सुनको मुल्य त्यसयता बढिरहेको हो । सुनको मुल्य सात दिनमा पाँच हजार चार सय रुपैयाँले बढेको छ ।
मध्यपूर्वलगायत क्षेत्रमा बढ्दो भू–राजनीतिक अनिश्चितताका कारण व्यापारीहरूले सुनलाई सुरक्षित सम्पत्तिका रूपमा कारोबार गर्दा मागमा आएको वृद्धिले मुल्य बढेको हो ।
त्यस्तै आज चाँदीको मुल्य पनि बढेको छ । चाँदीको मुल्य पाँच रुपैयाँले बढेर तोलाको दुई हजार एक सय रुपैयाँमा कारोबार भइरहेको महासङ्घले जनाएको छ ।
