काठमाडौँ । ललिता निवास जग्गा प्रकरणमा पक्राउ परेका बहालवाला सचिव कृष्णबहादुर राउतसहित चारजनाको बन्दी प्रत्यक्षीकरणसम्बन्धी रिटमा सोमबार सुनुवाइ हुँदैछ। सर्वोच्च अदालतका न्यायाधीशद्वयस् प्रकाशकुमार ढुंगाना र नहकुल सुवेदीको इजलासमा सुनुवाइ हुन लागेको हो।
सञ्चार, सूचना तथा प्रविधिमन्त्रालयका बहालवाला सचिव कृष्णबहादुर राउत, भाटभटेनी सुपरमार्केटका सञ्चालक मीनबहादुर गुरूङ, निर्वाचन आयोगका पूर्वआयुक्त सुधीरकुमार शाह र धर्मप्रसाद गौतमले धरौटीमा रिहा हुनुपर्ने माग राख्दै बन्दी प्रत्यक्षीकरणको रिट हालेका हुन्।
सर्वोच्चले आइतबार धरौटीमा रिहा हुनुपर्ने माग गरेर दायर गरेको रिटको पेसी सोमबार राख्न आदेश दिएको थियो। हिजो न्यायाधीश द्वयः शुष्मालता माथेमा र तीलप्रसाद श्रेष्ठको इजलासमा हेर्न नभ्याएको अर्को दिनका लागि पेसी तोक्ने आदेश गरेको थियो।
केन्द्रीय अनुसन्धान ब्युरो (सिआइबी)ले यस प्रकरणमा हालसम्म १७ जनालाई पक्राउ गरिसकेको छ। आजै मात्र ब्युरोले काठमाडौँ जिल्ला अदालतबाट थप अनुसन्धान गर्न पाँच दिन हिरासतमा राख्न ब्युरोले अनुमति पाएको छ। यस प्रकरणमा पक्राउ परेकाहरू २० दिनदेखि हिरासतमा छन्। उनीहरूविरुद्ध मुलुकी ऐन, २०२० को किर्तेसम्बन्धी कसुर र संगठित अपराध कसुरमा प्रहरीले अनुसन्धान गरिरहेको छ ।
