बुटवल । आर्थिक वर्ष २०७९/०८० मा बुटवल उपमहानगरपालिकाले प्राप्त गरेको वित्तीय प्रगति सार्वजनिक गरेको छ । उपमहानगरले सार्वजनिक गरेको प्रगति प्रतिवेदन अनुसार गएको आर्थिक वर्षमा विनियोजन बजेटको ६९ दशमलव ५१ प्रतिशत खर्च गर्न सफल भएको छ ।
उपमहानगरले कूल २ अर्ब ४७ करोड ४५ लाख ७८ हजार ८ रुपैयाँ विनिजित रकम मध्ये १ अर्ब ७२ करोड ३ लाख २० हजार ३ सय ९ रुपैयाँ १३ पैसा खर्च गर्न सफल भएको छ । यसरी उपमहानगरले विनियोजन रकमको ३० दशमलव ४९ प्रतिशत अर्थात् ७५ करोड ४२ लाख ५७ हजार ६ सय ९८ रुपैयाँ ८७ पैयाँ खर्च गरेको छ । यसैगरी विनियोजित बजेटको चालूतर्फ ७५.०६ प्रतिशत खर्च गर्न सफल भएको छ भने पूँजीगत तर्फ ६३ दशमलव ४९ प्रतिशत खर्च गरेको छ, भने वित्तीय तर्फ ८२.३४ प्रतिशत खर्च गरेको पाईएको छ ।
उपमहानगरले चालूतर्फ १ अर्ब २७ करोड २३ लाख ७ हजार ८ सय ३० रुपैयाँ विनियोजन भएकोमा ९५ करोड ५० लाख ९९ हजार ६ सय १८ रुपैयाँ १४ पैसा खर्च गरेको छ भने ३१ करोड ७२ लाख ८ हजार २ सय ११ रुपैयाँ ९ पैसा खर्च गर्न सकेन । यसैगरी पूँजीगततर्फ १ अर्ब १९ करोड २२ लाख ७० हजार १ सय ७८ रुपैयाँ विनियोजन भएकोमा ७५ करोड ६९ लाख ८६ हजार ९ सय ९६ रुपैयाँ मात्रै खर्च भई ४३ करोड ५२ लाख ८३ हजार १ सय ८२ रुपैयाँ रकम खर्च गर्न असफल भएको हो। यसैगरी वित्तीयतर्फ एक करोड विनियोजन भएकोमा ८२ लाख ३३ हजार ६ सय ९४ रुपैयाँ ९९ पैसा खर्च भएको छ भने १७ लाख ६६ हजार ३० सय ५ रुपैयाँ १ रुपैयाँ खर्च भएको छैन ।
बुटवल उपमहानगरले गत आर्थिक वर्षमा आयतर्फ ७९ दशमलव २२ प्रतिशत लक्ष्य हासिल गरेको छ । कूल २ अर्ब ४७ करोड ४५ लाख ७८ हजार ८ रुपैयाँ अनुमानित आय हुने लक्ष्य राखिएकोमा १ अर्ब ९६ करोड ५ लाख १७ हजार ४ सय ७९ रुपैयाँ ६६ पैसा आम्दानी गर्न सफल भएको हो ।
