बुटवल । रुपन्देहीमा गतबर्षको तुलनामा यसबर्ष पूँजीगत खर्च बढेको पाईएको छ । कोष तथा लेखा नियन्त्रण कार्यालयले सोमबार भैरहवामा आर्थिक बर्ष २०७९/०८० को तथ्यांङ्क सार्वजनिक गर्दै आर्थिक बर्ष २०७८/०७९ को तुलनामा आर्थिक बर्ष २०७९/०८० मा पूँजीगत खर्च बढेको जनाएको हो ।
कार्यालयका अनुसार आर्थिक बर्ष २०७९/०८० मा बिनियोजित रकमको ८८ प्रतिशत रकम खर्च भएको छ । कोष तथा लेखा नियन्त्रण कार्यालयका प्रमुख कोष नियन्त्रक बिष्णुप्रसाद ज्ञवालीका अनुसार जिल्लाका लागि आर्थिक बर्ष २०७९/०८० मा ४२ अर्ब २ करोड ६९ लाख ६३ हजार ४ सय ५१ रुपैयाँ बिनियोजित भएको र त्यसमध्ये चालु र पूँजीगत गरी कुल खर्च ८८ प्रतिशत अर्थात् ३७ अर्ब १ करोड ८१ लाख ५७ हजार ८ सय ६५ रुपैयाँ खर्च भएको उल्लेख छ ।
आर्थिक बर्ष २०७९/०८० मा रुपन्देहीमा पूँजीगत खर्च ७१ प्रतिशत भएको बताईएको छ । पूँजीगत तर्फ ७ अर्ब १७ करोड ३५ लाख ९३ हजार ४ सय ४० रुपैयाँ मध्ये ५ अर्ब ८ करोड ६० लाख ९९ हजार १ सय १२ रुपैयाँ खर्च भएको जनाईएको छ । कोष तथा लेखा नियन्त्रण कार्यालयले उपलब्ध गराएको तथ्यांङ्क अनुसार पूँजीगत तर्फ असार महिनामा मात्रै कुल खर्चको ३०.७७ प्रतिशत अर्थात् २ अर्ब २० करोड ७० लाख ८० हजार ९ सय ५८ रुपैयाँ खर्च भएको छ । जिल्लामा पूँजिगत तर्फ केही कम खर्च भएको देखिएपनि यो भने सन्तोषजनक नै मान्न नसकिने कार्यालय प्रमुख ज्ञवालीको भनाई छ । उनले आर्थिक बर्ष २०७८/०७९ को तुलनामा आर्थिक बर्ष २०७९/०८० मा पूँजीगत खर्चमा बृद्धि भएको बताए ।
उनले भने “आर्थिक बर्ष २०७८/०७९ मा रुपन्देहीमा ४६ प्रतिशत मात्र पूँजीगत खर्च भएको थियो । स्थानिय तहमा चालु र पूँजीगत खर्च तर्फगरी सबैभन्दा बढी सियारी गाउँपालिकाले ८७.१५ प्रतिशत खर्च गरेको छ । सियारीले ७५ करोड ८८ लाख ५० हजार मध्ये ६६ करोड १३ लाख २१ हजार खर्च गरेको प्रमुख कोष नियन्त्रक ज्ञवालीले जनाए । जिल्लामा १६ वटा स्थानिय तहहरु रहेका छन् । जसमध्ये सबैभन्दा कम खर्च मर्चवारी गाउँपालिकाले गरेको छ । मर्चवारी गाउँपालिकाको कुल बजेट ५२ करोड २७ लाख २० हजार मध्ये ३३ करोड ७६ लाख ६७ हजार रुपैयाँ अर्थात् ६४.६० प्रतिशत मात्रै खर्च भएको छ ।
खर्च बढेपनि जिल्लामा गतबर्षको तुलनामा निकै कम राजस्व असुली भएको बताईएको छ । देशको दोस्रो ठूलो भन्सार मानिने भैरहवा भन्सारमा आयात निर्यात प्रभावित हुँदा रुपन्देहीमा गतबर्षको भन्दा पनि कम आम्दानी भएको तथ्यांङ्कले देखाएको छ । गत बर्षको भन्दा यसबर्ष आम्दानीको लक्ष्य बढी रहेपनि आम्दानी भने गत बर्ष भन्दा पनि कम भएको छ । जिल्लाको सबै भन्दा ठूलो आम्दानीको स्रोत भैरहवा भन्सार कार्यालयले नै लक्ष्य अनुसारको राजस्व असुल्न नसकेपछि आर्थिक बर्ष २०७८/०७९ को तुलनामा आर्थिक बर्ष २०७९/०८० मा २९ प्रतिशतले राजस्वमा कमि आएको छ ।
कोष तथा लेखा नियन्त्रण कार्यालयले उपलब्ध गराएको तथ्यांङ्क अनुसार आर्थिक बर्ष २०७८/०७९ मा रुपन्देहीमा १ खर्ब ४३ अर्ब ६४ करोड ५६ लाख ६० हजार २ सय ५१ रुपैयाँ ८४ पैसा राजस्व असुली भएकोमा यसको तुलनामा आर्थिक बर्ष २०७९/०८० मा १ खर्ब २ अर्ब २२ करोड ३० लाख ३७ हजार ८ सय ९० रुपैयाँ ६३ पैसा मात्रै राजस्व असुली भएको प्रमुख कोष नियन्त्रणका प्रमुख ज्ञवालीले बताए । यसबर्ष गत बर्षको भन्दा ४१ अर्ब ४२ करोड २६ लाख २२ हजार ३ सय ६१ रुपैयाँ २१ पैसा कम राजस्व असुली भएको जनाईएको छ ।
यस्तै जिल्लामा हाल सबैभन्दा बढी राजस्व भैरहवा भन्सार कार्यालयले असुल गरेको छ । भन्सारले ७६ अर्ब ८९ करोड ५ लाख ९८ हजार १ सय ८४ रुपैयाँ असुल गरेको कोष नियन्त्रण कार्यालयले जनाएको छ । यस्तै आन्तरिक राजस्व कार्यालय भैरहवाले पनि १२ अर्ब २३ करोड ८० लाख ७ हजार ४ सय ८४ रुपैयाँ र आन्तरिक राजस्व कार्यालय बुटवलले १० अर्ब ३६ करोड ३३ लाख ८ हजार २१ रुपैयाँ असुल गरेको छ ।
