गुल्मी । नाबालिकालाई जबर्जस्ती करणी गरेको आरोपमा गुल्मी जिल्लामा एक जना पुरुषलाई प्रहरीले पक्राउ गरेको छ ।
गुल्मी जिल्लाको रूरूक्षेत्र गाउँपालिका वडानम्बर- १ बस्ने ५७ वर्षका फर्सुराम पौडेललाई नाबालिकालाई बलात्कार गरेको आरोपमा पक्राउ गरिएको जिल्ला प्रहरी कार्यालय गुल्मीका सूचना अधिकारी तथा प्रहरी नायब उपरीक्षक (डिएसपी) चिरञ्जीवी दाहालले जानकारी दिनुभएको छ ।
पौडेलले अमरकल्याण महिला बिकास बहुउदेश्यीय सहकारी संस्था लिमिडेको संरक्षणमा रहेकी ११ वर्षिय नाबालिकालाई परिवर्तित नाम ४६ रुरुक्षेत्र ४ लाई २०७६ साल मंसिर १५ मा आफ्नो घरमा लिई पालनपोषण गर्दै आएका थिए ।
२०७७ सालको जेष्ठ महिनामा निजले बालिकालाई ललाई फकाई डर धाक दिई जबर्जस्ती करणी गरेकोमा एसोएस वालग्राम भैरहवाको संरक्षणमा रहेकी बालिकाले सो कुरा बताए पछि अनुसन्धानका लागि पक्राउ गरिएको प्रहरी नायव उपरीक्षक दाहालले बताउनुभयो ।
पौडेललाई जिल्ला अदालतबाट सात दिनको म्यादथप गरी आवश्यक अनुसन्धान भइरहेको जिल्ला प्रहरी कार्यालय गुल्मीले जनाएको छ ।
