ग्लोबल आइएमई बैंक लिमिटेडको नेतृत्वमा र लक्ष्मी सनराइज बैंकको सहभागितामा बनेको कन्सोर्टियम र सौर्य होल्डिङ प्रा. लि. बीच माथिल्लो मेवा खोला (ताप्लेजुङ) स्थित ३१.९२ मेगावाट क्षमताको जलविद्युत् आयोजनाको लागि रु ४ अर्ब ८५ करोड ७० लाख ऋण–लगानी गर्ने आर्थिक समझदारीमा फाइनान्सियल क्लोजर सम्झौतामा हस्ताक्षर सम्पन्न गरिएको छ ।
उक्त सम्झौतामा ग्लोबल आइएमई बैंकका प्रमुख कार्यकारी अधिकृत सुरेन्द्रराज रेग्मी, चिफ बिजनेस अफिसर कल्याण विक्रम पाँडे, लक्ष्मी सनराइज बैंकका चिफ बिजनेस अफिसर मनिषराज कुँवर तथा सौर्य होल्डिङका प्रबन्ध निर्देशक मोहन विक्रम कार्की सहभागी थिए ।
कुल अनुमानित लागत रु ६ अर्ब ३७ करोड रहेको यस आयोजनामा बैंकले ७५ प्रतिशत र सौर्य होल्डिङले बाँकी २५ प्रतिशत (हकप्रद जारीबाट) लगानी गर्नेछ। तीन वर्षभित्र निर्माण सम्पन्न गर्ने लक्ष्य राखिएको यस सम्झौताले परियोजना समयमा पूरा भई ऊर्जा उत्पादन बृद्धि, निर्यात प्रवद्र्धन र स्थानिय सामाजिक–आर्थिक विकासमा योगदान गर्ने अपेक्षा गरिएको छ ।
ग्लोबल आइएमई बैंक नेपाल सरकारले मान्यता प्राप्त ‘A’ वर्ग वाणिज्य बैंक हो र यो ३५२ शाखा, ३८५ एटीएम, १५८ शाखाहीन सेवा, ६८ एक्सटेन्सन काउन्टर तथा ३ विदेश प्रतिनिधि कार्यालयमार्फत १,००० भन्दा बढी सेवा केन्द्रबाट सञ्चालित छ। यसले विश्वभरबाट रेमिट्यान्स सेवा समेत उपलब्ध गराउँदै आएको हुँदा व्यावसायिक विश्वासिलो बैंकको रूपमा स्थापित छ ।
