काठमाडौँ । असार महिनाका लागि वाणिज्य बैंकहरूले बचत तथा मुद्दती निक्षेपको ब्याजदर घटाएका छन्। शनिबार बैंकहरूले सार्वजनिक गरेको मासिक ब्याजदर तालिका अनुसार जेठ महिनाको तुलनामा अधिकांश बैंकले ब्याजदरमा कटौती गरेका हुन् । यद्यपि, केही बैंकहरूले भने आंशिक रूपमा ब्याजदरमा वृद्धि गरेर समायोजन गरेका छन् । नबिल बैंक, प्रभु बैंक र हिमालयन बैंकले भने आफ्नो ब्याजदर स्थिर राखेका छन् ।
ब्याजदर घटाउनुमा प्रमुख कारणका रूपमा वर्षान्तमा बढेको सरकारी खर्च, ठेक्काका बिल भुक्तानीमार्फत प्रणालीमा आएको उच्च तरलता, र बढ्दो रेमिट्यान्सलाई देखिएको छ। असार सुरु भएसँगै सरकारका विभिन्न निकायहरूबाट ठेक्काका बिलहरू भुक्तानी हुन थालेका छन्, जसले बैंकिङ प्रणालीमा थप नगद प्रवाह गराएको छ ।
राष्ट्र बैंकका अनुसार हाल बैंकिङ प्रणालीमा झण्डै ४ खर्ब ५० अर्ब रुपैयाँभन्दा बढीको तरलता छ। केही दिनअघि राष्ट्र बैंकले सार्वजनिक गरेको रिपोर्टमा वैशाख महिनामा इतिहासकै सबैभन्दा धेरै रेमिट्यान्स भित्रिएको उल्लेख गरिएको थियो । यी सबै कारणले बैंकहरूमा अत्यधिक तरलता भएकोले सोही अनुसार ब्याजदर घटाएर नगद प्रवाहको सन्तुलन कायम राख्न खोजिएको हो ।
