काठमाडौं । माबिलुङ इनर्जी लिमिटेडले आज (असार २२ गते) देखि आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपाली नागरिकहरूका लागि प्राथमिक सेयर (आईपीओ) निष्कासन सुरु गरेको छ । कम्पनीले ३८ करोड ५८ लाख २४ हजार रुपैयाँ जारी पूँजीको ४८.९९९८ प्रतिशत हिस्सा अर्थात १८ लाख ९० हजार ५३० कित्ता शेयर निष्कासन गर्न लागिएको हो। यसमध्ये ३ लाख ८५ हजार ८२४ कित्ता शेयर संखुवासभा जिल्लाको मादि नगरपालिका वडा नं. ७, ८, ९ र चैनपुर नगरपालिका वडा नं. २, ३, ७, ८, ९ मा स्थायी बसोबास गर्ने स्थानीय बासिन्दाका लागि छुट्याइएको छ । त्यस्तै, १ लाख ५० हजार ४७१ कित्ता शेयर वैदेशिक रोजगारीमा रहेका नेपालीहरूका लागि छुट्याइएको छ ।
आईपीओमा न्यूनतम १० कित्तादेखि अधिकतम ५० हजार कित्तासम्म आवेदन दिन सकिनेछ । स्थानीय बासिन्दाका लागि आवेदनको म्याद छिटोमा साउन ४ गतेसम्म र ढिलोमा साउन १९ गतेसम्म तोकिएको छ भने वैदेशिक रोजगारीमा रहेका नेपालीहरूले भने साउन ४ गतेभित्र आवेदन दिनुपर्नेछ। कम्पनीको आईपीओ रेटिङ इक्रा नेपालले दिएको रेटिङ अनुसार ‘इक्रा एनपी इस्यूअर रेटिङ बी प्लस’ रहेको छ, जसले औसत जोखिम देखाउँछ ।
कम्पनीले सञ्चालनमा ल्याएको ४.९५ मेगावाट क्षमताको माथिल्लो पिलुवाखोला–३ जलविद्युत् आयोजना कुल लागत १ अर्ब १३ करोड ६० लाख रुपैयाँ रहेको छ। शेयर निष्कासन तथा बिक्री प्रबन्धक लक्ष्मी सनराइज क्यापिटल लिमिटेड रहेको छ । स्थानीयले ग्लोबल आइएमई बैंक चैनपुर, हिमालयन बैंक मादि, लक्ष्मी सनराइज बैंक खाँदबारी लगायत स्थानबाट आवेदन दिन सक्नेछन् भने वैदेशिक रोजगारीमा रहेका नेपालीले सि-आस्बा प्रणालीमार्फत आवेदन दिन सक्नेछन् ।
