काठमाडौं । नेपाल राष्ट्र बैंकले आज (शुक्रबार) आर्थिक वर्ष २०८२/८३ को मौद्रिक नीति सार्वजनिक गर्दैछ । बिहीबार साँझ बसेको सञ्चालक समितिको बैठकमा मौद्रिक नीतिको प्रस्ताव पेस भइसकेको र शुक्रबार विहानको बैठकमा नीति अन्तिम रूप दिइने भएको हो ।
राष्ट्र बैंकका अनुसार चालु वर्षको मौद्रिक नीति ५९औँ नीति हुनेछ। राष्ट्र बैंकको स्थापना २०१३ सालमा भए पनि २०२३ सालदेखि मात्रै मौद्रिक नीति ल्याउन थालिएको थियो। आर्थिक वर्ष २०५९/६० देखि भने गभर्नरले मौद्रिक नीति सार्वजनिक गर्ने प्रचलन सुरु भएको हो ।
नवनियुक्त गभर्नर डा. विश्वप्रकाश पौडेलको नेतृत्वमा यो पहिलो मौद्रिक नीति हुनेछ। उनले सरकारको नीति तथा कार्यक्रमसँग सहकार्य गर्दै राष्ट्र बैंकको नीति निर्माण गर्ने प्रतिबद्धता जनाएका छन् ।
मौद्रिक नीतिले मुलुकको मौद्रिक व्यवस्थापन, महँगी नियन्त्रण, विदेशी मुद्रा सञ्चिति सन्तुलन, र वित्तीय स्थायित्वमा केन्द्रीत रहनेछ। सरकारले लिएको ६ प्रतिशत आर्थिक वृद्धि र ५.५ प्रतिशत भित्रै मूल्यवृद्धि कायम राख्ने लक्ष्यलाई सहयोग पु-याउने गरी नीति ल्याइने बताइएको छ ।
यसका लागि करिब ११ प्रतिशत कर्जा विस्तारको लक्ष्य राखिने अनुमान गरिएको छ। साथै, मौद्रिक नीतिले हालको आर्थिक सुस्तता घटाउनेतर्फ जोड दिनेछ। चालु पुँजी कर्जामा लचिलो नीति अपनाउने संकेत दिइएको छ। केही दिनअघि मात्रै राष्ट्र बैंकले चालु पुँजी कर्जा मापदण्ड लागु हुने अवधि एक वर्ष पछाडि सार्ने र साना ऋणीका भाका दुई वर्षलाई सार्ने निर्णय गरिसकेको छ ।
सरकारले बजेटमा समस्याग्रस्त क्षेत्रलाई कार्यशील पुँजी प्रवाह गर्ने उल्लेख गरेअनुसार नीति त्यसैको पूरक बन्ने अपेक्षा गरिएको छ ।
