बुटवल । रुपन्देहीको तिलोत्तमा नगरपालिका–३ मा रहेको डिंगरनगर दूरगामी बहुउद्देश्यीय सहकारी संस्थामा करोडौं रुपैयाँ अपचलन भएको सार्वजनिक भएपछि संस्थामा व्यापक अडिट कार्य सुरु भएको छ। प्रहरीको सुरक्षामा सहकारी कार्यालय नजिकैको मन्दिर परिसरमा अडिटर राखेर हिसाब गर्ने कार्य जारी छ ।
अध्यक्ष घनश्याम तिवारी र सचिव रामबहादुर थापा (क्षेत्री) सम्पर्कविहीन रहेका बेला सहकारीका व्यवस्थापक बसन्त पराजुलीले शुक्रबार दिउँसो प्रहरी सामु आत्मसमर्पण गरेका हुन् । करिब २,२०० सदस्य रहेको सहकारीमा ठगीको शंका बढेपछि आक्रोशित बचतकर्ताले अध्यक्ष र सचिवको घर घेराउ गरी दोषीलाई कारबाहीको माग गरेका थिए ।
पराजुलीले प्रहरी र अडिटरसामु सहकारीको पहिलो दिनदेखि नै लेखापालना जाँच गर्न आग्रह गरेका छन् । उनलाई इलाका प्रहरी कार्यालय बुटवलमा राखिएको छ र आइतबार सरकारी वकिलको कार्यालयमार्फत अदालतमा पेश गरिनेछ ।
स्रोतका अनुसार, पराजुलीले तीन जना शेयर सदस्य र आफ्नै परिवारको नाममा नौ करोड ५५ लाख ३० हजार ८८ रुपैयाँ किर्ते ऋण देखाएर अपचलन गरेको कबुल गरिएको तमसुक फेला परेको छ। उक्त तमसुकमा उनका छोरी–छोरा साक्षी रहेको देखिएकाले अध्यक्ष र सचिवको संलग्नता वा पराजुलीको एकल कारबाही भन्ने निष्कर्ष अडिट रिपोर्टपछि मात्रै खुल्नेछ ।
