काठमाडौं । अघिल्लो दिन उच्च अंकले वृद्धि भएको सेयर बजार आज एकै दिनमै भारी गिरावटसहित ओरालो लागेको छ। नेपाल राष्ट्र बैंकबाट सार्वजनिक मौद्रिक नीतिपछिको पहिलो दिन सकारात्मक देखिएको बजार आज भने नकारात्मक प्रवृत्तिमा फर्किएको हो ।
नेपाल स्टक एक्सचेञ्ज (नेप्से) का अनुसार आज सेयर बजार परिसूचक ३५.०९ अंकले घटेर २७२५.७१ विन्दुमा झरेको छ । यो अघिल्लो दिनको तुलनामा १.२७ प्रतिशतले कम हो ।
आज ‘क’ वर्गका कम्पनीहरूको मापन गर्ने सेन्सेटिभ इन्डेक्स पनि ६.८३ अंकले घटेर ४७४.३५ विन्दुमा पुगेको छ, जुन अघिल्लो दिनको तुलनामा १.४२ प्रतिशतले घटेको हो ।
बजारमा समग्र रूपमा दबाब देखिएको छ, जसअनुसार १३ उपसूचकहरूमध्ये १२ वटामा गिरावट आएको छ भने केवल एउटा उपसूचकमा मात्र सुधार देखिएको छ। आज १९८ कम्पनीको सेयर मूल्य घटेको छ भने केवल ५० कम्पनीको मात्र सेयर मूल्य बढेको छ ।
कारोबार रकममा समेत उल्लेखनीय गिरावट आएको छ। अघिल्लो दिन ११ अर्ब माथिको कारोबार भएको बजारमा आज ८ अर्ब १७ करोड २१ लाख ४३ हजार रुपैयाँ बराबरको कारोबार मात्र भएको छ ।
कुल ३२१ कम्पनीका २ करोड ११ लाख कित्ता सेयर ७२ हजार ६०१ पटक किनबेच भएका छन् ।
विश्लेषकहरूका अनुसार मौद्रिक नीतिको प्रभाव र लगानीकर्ताको मनोविज्ञानले बजारमा चाँडै उतारचढाव ल्याइरहेको छ ।
