काठमाडौँ । गायिका ज्योति मगर सामाजिक सञ्जालमा लेख्ने स्टाटसका कारण सधैँ चर्चामा आउँछिन् । उनी सामाज होस् वा राजनीतिक विकृति विसंगति, कडा आक्रोश पोख्छिन् ।
अहिले भने उनले राष्ट्रिय झण्डाको आवरणमा देशलाई नै क्षति पुर्याउने प्रवृति बढेको भन्दै चिन्ता प्रकट गरेकी छन् । उनले सामाजिक सञ्जालमा बिहीबार एक पोस्ट गर्दै यस विषयमा चिन्ता पोखेकी हुन् ।
‘नेपालको झण्डा ओढेर राजनीति गरेको देखेँ, झण्डा ओढेरै देश छोड्दै गरेको र नागरिकता त्यागेको पनि देखेँ । देशकै झण्डा ओढेर देश नै खतम छ भन्दै गाली गरेको पनि देखेँ’, उनी लेख्छिन् ‘देशको झण्डा ओढेर एक पटक देश बिदेशीलाई दियो भने भारतमा ब्रिटिसले बिकास गरे जस्तै बिकास गर्दिन्छन् भनेको नि देखे ।’
झण्डा ओढेर देश जलाएको देख्दा आफूलाई सबैभन्दा बढी दर्द भएको उनले बताएकी छन् । उनी सबैभन्दा बढी पीडा देशमा हुने हिंसात्मक गतिविधि र त्यसलाई राष्ट्रवादको नाम दिनेहरूबाट भएको लेखेकी छन् ।
‘सबैभन्दा दर्द त त्यतिबेला भयो जब नेपालको झण्डा ओढेर नेपाल जलाएको देखेँ । देशको झण्डा ओढेर नेपाल जलेको खुसियालीमा ‘भिक्ट्री पोज’मा फोटो खिचेको देखेँ,’ उनको पोस्टमा छ ।
धेरै झण्डा ओढ्ने राष्ट्रवादीहरू देखे पनि राष्ट्रियता र राष्ट्रप्रेमी नदेखेको उनको लेखाइ छ । ‘मुखौटा ओढेका राष्ट्रवादीहरूले राष्ट्रको झण्डा ओढेर राष्ट्र खोक्रो बनाउँदै गरेको लाचारपूर्वक टुलुटुलु हेर्नु मेरो आजभोलिको दिनचर्या भएको छ,’ उनले लेखेकी छन् ।
