गुल्मी । गुल्मीमा कुलो खन्ने क्रममा पहिरो खस्दा तीन जना घाइते भएका छन् । शनिबार दिउँसो गुल्मी जिल्लाको सत्यवती गाउँपालिका(२, चेहेमीस्थित चेहेमी सिंचाई कुलोमा कुलो खन्ने क्रममा अचानक माथिबाट पहिरो खस्दा तीन जना घाइते भएको जिल्ला प्रहरी कार्यालय गुल्मीले जनाएको छ ।
कुलो खन्ने क्रममा पहिरोमा परि सत्यवती गाउँपालिका(२ चेहेमीका ६८ वर्षीय भगवती कुँवर, ४६ वर्षीय लक्ष्मी दर्जी र ४१ वर्षीय प्रेमकला कुँवर घाइते हुनुभएको जिल्ला प्रहरी कार्यालय गुल्मीका प्रवक्ता प्रहरी नायब उपरीक्षक डिल्लीनारायण पाण्डेले जानकारी दिनुभयो ।
घाइते ६८ वर्षीय कुँवर र ४६ वर्षीय दर्जीको दुवै खुट्टामा चोट लागेको छ । ४१ वर्षीय कुँवरको कम्मरको भागमा र दुवै खुट्टामा चोट लागेको छ । उहाँहरुको उपचारको लागि पाल्पाको मिसन अस्पतालमा लगिएको जिल्ला प्रहरी कार्यालयले जनाएको छ ।
