काठमाडौं । रुपन्देहीको बुटवल उपमहानगरपालिकामा भएका दुई छुट्टाछुट्टै चोरी तथा चोरी प्रयासका घटनामा संलग्न रहेको आरोपमा प्रहरीले आठ जनालाई पक्राउ गरेको छ। पक्राउ पर्नेमा सात जना भारतीय नागरिक र एक जना नेपाली नागरिक रहेका छन्।
रुपन्देही प्रहरी प्रमुख प्रहरी उपरीक्षक जनकबहादुर शाहीका अनुसार गत जेठ १९ गते राति करिब २ः३० बजे गस्तीमा रहेको प्रहरी टोलीले बुटवल उपमहानगरपालिका–५ विकासपथस्थित ‘देव सुनचाँदी पसल’को सटरको ताला काट्दै गरेको अवस्थामा सात जनालाई रङ्गेहात पक्राउ गरेको हो।
पक्राउ पर्नेहरूमा भारतको उत्तर प्रदेश, सन्तकविरनगर जिल्लाका २६ वर्षीय आकाश वर्मा, २७ वर्षीय अब्दुल सलमा, १९ वर्षीय नसिर अली, २३ वर्षीय मोहम्मद सुलेमान, २८ वर्षीय शहिद मोहम्मद सेख, २१ वर्षीय कर्ण शर्मा र २३ वर्षीय मोहम्मद पारिस रहेका छन्। उनीहरूको साथबाट ताला काट्न प्रयोग गरिने कैँची र पेचकस समेत बरामद गरिएको प्रहरीले जनाएको छ।
प्रहरीका अनुसार उक्त सुनचाँदी पसलका सञ्चालक ४१ वर्षीय दीपक बिक पोखरा गएको अवस्थामा पसलबाट करिब १ करोड ४६ लाख ९४ हजार ७ सय रुपैयाँ बराबरका सुनचाँदीका गरगहना चोरी भएको सूचना प्राप्त भएको थियो। घटनापछि गरिएको अनुसन्धानका क्रममा सोही पसलका सञ्चालक दीपक बिक र कर्मचारी नवीन बिकको संलग्नता रहेको देखिएको प्रहरीको दाबी छ।
प्रहरी उपरीक्षक शाहीले बीमा रकम दाबी गर्ने तथा विभिन्न व्यक्तिले धितोमा राखेका सुनचाँदी हिनामिना गर्ने उद्देश्यले चोरीको योजना बनाइएको प्रारम्भिक अनुसन्धानबाट खुलेको बताए। उनका अनुसार घटनामा अझ बढी परिमाणमा सुनचाँदीको कारोबार वा हिनामिनाको तथ्य बाहिर आउन सक्ने अनुमान गरिएको छ र अनुसन्धान जारी रहेको छ।
यस्तै, गत जेठ ४ गते बुटवल उपमहानगरपालिका–८ सुक्खानगरस्थित राजेश कुमार गुप्ताको घरमा भएको चोरी घटनामा संलग्न रहेको आरोपमा कपिलवस्तु नगरपालिका–२ निवासी २७ वर्षीय शिव ओम थारुलाई पनि प्रहरीले पक्राउ गरेको छ।
उनको साथबाट चोरी भएका सुनका दुई थान बाला, लकेटसहितको सिक्री, अर्को सिक्री, चार थान कानपासा, एक जोडी झुम्का, एक जोडी बाली, दुई थान माला, तीन थान औँठी, एक जोडी टप, स्टोन फुलीलगायतका गरगहना बरामद गरिएको प्रहरीले जनाएको छ।
यसका साथै चाँदीको एक थान लोटा, छ थान बिच्छु र एक थान औँठी समेत बरामद भएको छ।
प्रहरीले पक्राउ परेका सबै अभियुक्तहरूमाथि चोरी सम्बन्धी कसुरमा अदालतबाट म्याद थप गरी थप अनुसन्धान गरिरहेको जनाएको छ।
