काठमाडौं — नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ले सरकार बनाउने र गिराउने राजनीतिमै केन्द्रित हुनु आफ्नो राजनीतिक यात्राको ठूलो गल्ती भएको स्वीकार गरेका छन्।
सोमबार २४औं बोत्ले स्मृति दिवसको अवसरमा आयोजित कार्यक्रममा बोल्दै प्रचण्डले प्रधानमन्त्री बनाउने–फाल्ने र सरकार गठन तथा विघटनलाई नै राजनीतिक सफलताको मापदण्ड बनाउँदा पार्टीको आधार वर्गसँगको सम्बन्ध कमजोर बन्दै गएको बताए।
उनले मजदुर, किसान तथा उत्पीडित समुदायसँगको सम्बन्ध विस्तारै कमजोर भएको स्वीकार गर्दै यही प्रवृत्तिको प्रभाव प्रदेश र स्थानीय तहसम्म पुगेको उल्लेख गरे। केन्द्रका नेताहरू मन्त्री र प्रधानमन्त्री बन्नेतर्फ केन्द्रित भएपछि प्रदेशका नेताहरू पनि मन्त्री र मुख्यमन्त्री बन्नेमै केन्द्रित हुनु स्वाभाविक बनेको उनको भनाइ थियो।
प्रचण्डले यस्तो प्रवृत्तिका कारण कम्युनिस्ट आदर्शबाट विचलन भएको स्वीकार गर्दै यही नै प्रमुख गल्ती भएको बताए। साथै, नेताहरूको जीवनशैली परिवर्तन हुँदै सदरमुकाम र राजधानी केन्द्रित भएपछि जनताले उनीहरूलाई कम्युनिस्टका रूपमा विश्वास गर्न छाडेको पनि उनले उल्लेख गरे।
उनले दस्तावेज र सिद्धान्तमा मात्र सीमित भएर सरकार निर्माणको राजनीतिमा केन्द्रित हुँदा जनतासँगको प्रत्यक्ष सम्बन्ध कमजोर भएको निष्कर्ष समेत व्यक्त गरे।
