काठमाडौँ । नेपाली कांग्रेसका सभापति गगन थापाले पार्टीको आत्मा र आदर्शलाई जोगाउँदै कांग्रेसलाई एकताबद्ध बनाउने बताएका छन्।

सर्वोच्च अदालतको पछिल्लो आदेशपछि कांग्रेसभित्र एकताको विषयमा संस्थापन पक्षमाथि दबाब बढिरहेका बेला सभापति थापाले पार्टीको आत्मा र विचारलाई समाप्त पारेर गरिने एकता स्वीकार्य नहुने बताएका हुन्।

भक्तपुरमा आयोजित एक कार्यक्रममा बोल्दै थापाले विशेष महाधिवेशनबाट पारित पार्टीको विचार, सिद्धान्त र आत्मालाई जोगाउँदै कांग्रेसलाई एकताबद्ध बनाउने प्रतिबद्धता व्यक्त गरे।

उनले पार्टीभित्र देखिएका मतभेद र असन्तुष्टिलाई संवाद तथा संस्थागत प्रक्रियामार्फत समाधान गर्दै कांग्रेसलाई थप बलियो बनाउने बताए।

थापाले यस विषयमा आवश्यक छलफल र निर्णयका लागि आजै पदाधिकारी बैठक बस्ने जानकारी दिए। उनका अनुसार भोलिबाट सुरु हुने केन्द्रीय कार्यसमिति बैठकले पार्टी एकता तथा आगामी रणनीतिबारे आवश्यक निर्णय गर्नेछ।

सभापति थापाले कांग्रेसलाई सबै कार्यकर्ता र समर्थकले गौरव गर्न सक्ने पार्टीका रूपमा विकास गर्ने दाबी पनि गरे।

उनले कांग्रेसप्रति आफ्नो राजनीतिक आस्था र पहिचानलाई लिएर कसैले पनि संकोच मान्न नपर्ने वातावरण निर्माण गर्ने बताए। ‘कांग्रेसको झोले’ भनेर आलोचना गरिए पनि त्यसलाई गर्वका साथ स्वीकार गर्न सक्ने पार्टी निर्माण गर्ने उनको भनाइ थियो।

थापाले कांग्रेसलाई केवल सांगठनिक रूपमा एकताबद्ध गर्ने नभई पार्टीको विचार, आदर्श र राजनीतिक पहिचानलाई बलियो बनाउँदै अघि बढाउने संकेत गरेका छन्।