काठमाडौं । नेपाली कांग्रेसका निवर्तमान सभापति शेरबहादुर देउवाले नेपाली जनता नै देशका वास्तविक मालिक भएको बताएका छन्।
बिहीबार स्वदेश फर्किएपछि चुनदेवीस्थित कांग्रेस संस्थापन इतर समूहको सम्पर्क कार्यालयमा नेता–कार्यकर्तालाई सम्बोधन गर्दै उनले जनताले चाहेको कुरा नै अन्ततः हुने बताएका हुन्।
देउवाले संविधानसभाबाट गणतन्त्र आएको उल्लेख गर्दै त्यसको श्रेय आफूलाई मात्र नदिने बताए। उनले भने, ‘संविधानसभाले ल्याएको हो, गणतन्त्र। मैले ल्याएको हो? मैले चाहँदा आएको पनि होइन, मैले चाहेर जाँदैन पनि।’
जनतालाई देशको सर्वोच्च शक्ति भन्दै उनले भने, ‘नेपाली जनता नेपालको मालिक हो, यो मालिकले जे भन्यो त्यही हुन्छ।’
देउवाले नेपाली जनता र न्यायपालिकामाथि आफूलाई पूर्ण विश्वास रहेको पनि बताए। सर्वोच्च अदालतले पञ्चायतकालदेखि नै निष्पक्ष न्याय दिँदै आएको उल्लेख गर्दै उनले अदालतप्रति आफ्नो विश्वास कायम रहेको बताए।
झन्डै ६ महिनापछि स्वदेश फर्किएका देउवाले आगामी दिनमा पनि आफू राजनीतिक रूपमा लडिरहने संकेत गरे।
