काठमाडौं । नेपाली कांग्रेसका नेता मोहनबहादुर बस्नेतले सभापति गगनकुमार थापाले चुनाव नलडे आफू पनि चुनाव नलड्ने बताएका छन् । इतर पक्षको राष्ट्रिय भेलामा बोल्दै बस्नेतले थापाले ५५ वर्षमा राजनीति छाड्छु भनेको र उक्त समय सकिन अब तीन वर्षमात्र बाँकी रहेको बताए ।
कुनै बेला आफूले थापाको चुनाव क्षेत्र नभएको बोलेको र हाल आएर प्रमाणित भएको बस्नेतले बताए । “गगन थापाको कुनै चुनाव क्षेत्र छैन भनेको थिएँ, त्यो प्रमाणित भएको छ । सिन्धुपाल्चोक एकलौटी कांग्रेस बनाएर आएको हुँ । तपाईंजस्तो भागीभागी अर्काले दुख गरेको ठाउँमा चुनाव लड्न परेको छैन,” बस्नेतले भने ।
आफू अझै २० वर्ष चुनाव लड्न सक्ने बताएका बस्नेतले सभापति थापाले छाडेको खण्डमा आफूले पनि छाडेर युवा अघि बढाउने बताए । “म छाड्न तयार छु, तपाईं पनि छाड्नुहोस । अब राजनीति गर्दिन, युवालाई जिम्मा लगाउँछु भन्नुहोस, नगर्नुस, म पनि तपाईंजस्तै लड्दै आएको हुँ, तपाईंले लड्नुभएन भने म पनि कुनै चुनाव लड्दिनँ । मुखले होइन, फण्डा गरेर होइन, व्यवहारमा आफूलाई उतारौँ,” उनले भने ।
विशेष महाधिवेशन पक्षधरले आफूहरूलाई खरानी दस्ता भन्ने गरेता पनि शेरबहादुर देउवाको स्वदेश फिर्तीको क्रममा देखिएको उपस्थितिले विशेष महाधिवेशन नै खरानी दस्ता भएको उनले बताए । बस्नेतले भने, “हिजो हामीलाई विशेष महाधिवेशन पक्षले खरानी दस्ता भन्नुभएको थियो, हिजोको उपस्थितिले खरानी दस्ता चाहिँ विशेष महाधिवेशन भैसक्नुभएको छ ।”
