काठमाडौँ । नेपाली कांग्रेसका सभापति गगन थापाले पार्टीका निवर्तमान सभापति शेरबहादुर देउवालाई भेट्ने तयारी गरेका छन्। थापाले देउवालाई भेट्न समय मागेको देउवाका स्वकीय सचिव भानु देउवाले जानकारी दिएका छन्।
भानु देउवाका अनुसार थापाले टेलिफोनमार्फत देउवासँग भेट गर्ने इच्छा व्यक्त गर्दै समय मागेका हुन्। भेटका लागि समय मिलाएर थापालाई बोलाइने उनले बताएका छन्।
जेनजी आन्दोलनका क्रममा भएको आक्रमणमा परी घाइते भएका देउवा उपचारका लागि सिंगापुर गएका थिए। उपचारपछि उनी गत साउन २८ गते करिब साढे पाँच महिनापछि स्वदेश फर्किएका हुन्।
देउवा स्वदेश फर्किएपछि कांग्रेस नेतृत्व तहमा शीर्ष नेताहरूबीच भेटघाट र संवादको क्रम बढ्ने अपेक्षा भइरहेका बेला थापाले भेटका लागि समय माग्नुलाई अर्थपूर्ण रूपमा हेरिएको छ।
पार्टी सभापतिको जिम्मेवारी सम्हालेपछि थापाले निवर्तमान सभापति देउवासँग गर्न लागेको भेटमा पार्टीको आन्तरिक अवस्था, आगामी राजनीतिक रणनीति र समसामयिक विषयमा छलफल हुनसक्ने अनुमान गरिएको छ।
यद्यपि, भेटको मिति र समय भने औपचारिक रूपमा तय भइसकेको छैन। भानु देउवाका अनुसार समय मिलाएर थापालाई भेटका लागि बोलाइनेछ।
देउवा–थापा भेटले कांग्रेसभित्रको पछिल्लो राजनीतिक समीकरण र नेतृत्वबीचको सम्बन्धबारे नयाँ सन्देश दिने अपेक्षा गरिएको छ।
