काठमाडाैं । नेपाली काँग्रेसका नेता एवं सांसद अर्जुननरसिंह केसीले राजनीतिक दलहरूको आन्तरिक, कानूनी र संवैधानिक व्यवस्थापन हेर्ने अन्तिम निकाय निर्वाचन आयोग भएको बताउनुभएको छ ।
संघीय संसद भवनबाहिर सञ्चारकर्मीहरूसँग कुरा गर्दै नेता केसीले अदालत सामान्यतया पार्टीका आन्तरिक मामिलामा प्रवेश नगर्ने र हालैको फैसलालाई पनि पूर्णपाठ वा प्रक्रियागत सुधारको अर्थमा बुझ्नुपर्ने टिप्पणी गर्नुभएको हो । सर्वोच्च अदालतको पछिल्लो निर्णयलाई हार्दिकतापूर्वक स्वीकार गर्ने बताउनुभयो ।
नेपाली काँग्रेसको आन्तरिक राजनीतिका सन्दर्भमा नेता केसीले पार्टीभित्र एकता र लचिलोपनको आवश्यकता औंल्याउनु भयो । लोकतन्त्रको संस्थापक र संवाहक शक्तिका रूपमा काँग्रेसले राष्ट्रिय चुनौतीहरूको सामना गर्न एक ढिक्का हुनुपर्ने उहाँको तर्क थियो। उहाँले पार्टीभित्रको गतिरोध अन्त्यका लागि विशेष अधिवेशनमार्फत सहमतिपूर्ण वातावरण निर्माण गर्नुपर्नेमा जोड दिनुभयो ।
उहाँले भन्नुभयो, ‘अदालत कुनैपनि पार्टीको आन्तरिक राजनीतिमा प्रवेश गर्छ भन्ने मलाई विश्वास छैन। अप्रत्याशित रूपमा आएको निर्णयलाई स्वीकार गरे पनि यसबाट विचलित हुनुपर्ने वा तर्सिनुपर्ने अवस्था छैन । कम तामझामका साथ साधारण ढंगले भ्रमण गर्नु सकारात्मक पक्ष हो । जुन सरलता र सादगी प्रधानमन्त्रीले बाहिर देखाउनुभएको छ, त्यही सम्मान संसदप्रति पनि देखाउनु आवश्यक छ ।
संसदले नै उहाँलाई निर्माण र निर्देशन गर्ने भएकाले संसदप्रति उहाँ थप उत्तरदायी हुनुपर्छ ।’
प्रधानमन्त्रीको हालैको मुस्ताङ भ्रमणबारे टिप्पणी गर्दै केसीले भ्रमणमा देखिएको सादगी र सरलताको प्रशंसा गर्नुभयो । सरकारको कार्यशैलीप्रति टिप्पणी गर्दै उहाँले मुलुकमा बढ्दै गएको असन्तुष्टि र निराशाप्रति सरकार सचेत हुनुपर्ने बताउनु भयो ।
