कपिलवस्तु । भोटेकोशी नदीमा आएको भीषण बाढीबाट प्रभावित नागरिकको राहत, उद्धार तथा पुनःस्थापनाका लागि कपिलवस्तु नगरपालिकाले ५१ लाख ११ हजार रुपैयाँ सहयोग गर्ने निर्णय गरेको छ ।
नगर कार्यपालिकाको बैठकले उक्त रकम प्रधानमन्त्री दैवी प्रकोप उद्धार कोषमा एकमुष्ट जम्मा गर्ने निर्णय गरेको हो । नगरपालिकाका अनुसार सहयोग रकममा जनप्रतिनिधि, कर्मचारी तथा शिक्षकहरूको समेत योगदान समेटिएको छ ।
विपत्तिको घडीमा स्थानीय सरकारको साथ र ऐक्यबद्धता देखाउँदै नगर प्रमुख सुदीप पौडेलले आफ्नो एक महिनाको तलबसमेत सहयोग गर्ने घोषणा गरेका छन् । जनप्रतिनिधि, कर्मचारी तथा शिक्षकहरूको सामूहिक योगदानले बाढीपीडितप्रतिको स्थानीय सरकारको जिम्मेवारी र मानवीय संवेदनालाई थप प्रस्ट पारेको नगरपालिकाले जनाएको छ ।
प्राकृतिक विपत्तिबाट ठूलो जनधनको क्षति भइरहेका बेला कपिलवस्तु नगरपालिकाले घोषणा गरेको ५१ लाख ११ हजार रुपैयाँको सहयोग हालसम्म विभिन्न स्थानीय तहबाट घोषणा भएका सहयोगमध्ये उल्लेखनीय रकम रहेको जनाइएको छ ।
नगरपालिकाले बाढी तथा प्राकृतिक विपत्तिमा परेका नागरिकको राहत, उद्धार र पुनःस्थापनामा थप सहयोग जुटाउन नगरवासी, संघ–संस्था, निजी क्षेत्र तथा सहयोगी मनहरूलाई समेत हातेमालो गर्न अपिल गरेको छ ।
नगरपालिकाको सन्देश छ- “विपत्तिमा सहयोगको हात बढाऔँ, मानवताको धर्म निभाऔँ।”
