काठमाडौँ । प्रमुख प्रतिपक्षी दल नेपाली कांग्रेसले मुलुकको पछिल्लो राजनीतिक घटनाक्रम तथा रसुवामा गएको विनाशकारी बाढीबाट उत्पन्न परिस्थितिबारे साझा धारणा बनाउन विपक्षी दलहरूको संयुक्त बैठक बोलाएको छ।
कांग्रेस संसदीय दलका नेता भीष्मराज आङदेम्बेको आह्वानमा बिहीबार बिहान ११ बजे सिंहदरबारस्थित कांग्रेस संसदीय दलको कार्यालयमा विपक्षी दलहरूको बैठक बस्ने भएको कांग्रेस प्रमुख सचेतक वासना थापाले जानकारी दिइन्।
थापाका अनुसार बैठकमा नेकपा एमाले, नेपाली कम्युनिस्ट पार्टी, श्रम संस्कृति पार्टी तथा राष्ट्रिय प्रजातन्त्र पार्टीलाई छलफलका लागि बोलाइएको छ।
बैठकमा देशको समसामयिक राजनीतिक अवस्था, सरकारका पछिल्ला कामकारबाही तथा रसुवा बाढीले जनजीवन, भौतिक संरचना र प्रभावित समुदायमा पारेको असरबारे गम्भीर छलफल हुने जनाइएको छ।
विपद् व्यवस्थापन तथा राहत, उद्धार र पुनःस्थापनामा सरकारको भूमिकाबारे पनि विपक्षी दलहरूले साझा धारणा बनाउने तयारी गरेका छन्। साथै संसद्मा विपक्षी दलहरूले आगामी दिनमा कसरी प्रभावकारी रूपमा अघि बढ्ने भन्ने विषयमा समेत बैठकमा रणनीतिक छलफल हुने बताइएको छ।
पछिल्लो राजनीतिक घटनाक्रम र विपद्पछि उत्पन्न राष्ट्रिय चुनौतीका बीच विपक्षी दलहरूलाई एउटै धारणा र साझा एजेन्डामा ल्याउने कांग्रेसको प्रयासलाई अर्थपूर्ण रूपमा हेरिएको छ।
