अर्घाखाँची । नेपाली कांग्रेस अर्घाखाँची जिल्ला कार्यसमितिको बैठकले भोटेकोशी बाढीमा परी ज्यान गुमाउने अर्घाखाँचीसहित स्वदेश तथा विदेशका नागरिकहरूप्रति श्रद्धाञ्जली व्यक्त गर्दै शोकसन्तप्त परिवारजनप्रति गहिरो समवेदना प्रकट गरेको छ।
जिल्ला सभापति केशव श्रेष्ठको सभापतित्वमा भदौ २७ गते शनिबार सम्पन्न बैठकले बाढीमा परी घाइते भएकाहरूको शीघ्र स्वास्थ्यलाभको कामना गर्दै उनीहरूको उपचार निःशुल्क गर्न, बेपत्ताहरूको खोजी कार्य तीव्र बनाउन तथा प्रभावित नागरिकका लागि तत्काल राहतसँगै पुनःस्थापना र पुनर्वासको प्रभावकारी व्यवस्था गर्न नेपाल सरकारको ध्यानाकर्षण गराउने निर्णय गरेको छ।
त्यस्तै, भोटेकोशी बाढी प्रभावितको सहयोगका लागि नेपाली कांग्रेस केन्द्रीय समितिमार्फत प्रधानमन्त्री दैवी प्रकोप उद्धार कोषमा रु. १ लाख सहयोग गर्ने जिल्ला पदाधिकारीहरूले गरेको निर्णयलाई बैठकले अनुमोदन गरेको छ।
बैठकले नेपाली कांग्रेसको १५औँ महाधिवेशनलाई लक्षित गर्दै केन्द्रीय समितिको निर्णयअनुसार अर्घाखाँची जिल्लाका ६१ वटै वडामा असोज ३ गते, ६ वटै पालिकामा असोज ७ गते र दुईवटै प्रदेशसभा क्षेत्रमा असोज १० गते अधिवेशन सम्पन्न गर्ने निर्णय गरेको छ। अधिवेशन सम्पन्न गर्न सम्बन्धित समितिहरूलाई आवश्यक सम्पूर्ण जिम्मेवारी प्रदान गर्ने निर्णयसमेत गरिएको छ।
यसैगरी, जिल्लामा खटिने मुख्य निर्वाचन अधिकृतसँग भदौ २८ गते बैठक बसी सम्बन्धित प्रदेशसभा क्षेत्र र पालिकासँगको परामर्शमा जिल्लाका ६१ वटै वडा, ६ वटै पालिका र दुईवटै प्रदेशसभा क्षेत्रमा निर्वाचन अधिकृत खटाउने निर्णय गरिएको छ। खटिएका निर्वाचन अधिकृतहरूलाई भदौ ३१ गते केन्द्रीय प्रतिनिधिमार्फत प्रशिक्षण दिने तयारीसमेत गरिएको छ।
बैठकमा नेपाली कांग्रेस केन्द्रीय सदस्य कमलप्रसाद भुसाललगायत नेता तथा पदाधिकारीहरूको उपस्थिति रहेको थियो।
जिल्ला कार्यसमितिले विपद्का बेला प्रभावित नागरिकको उद्धार, राहत र पुनःस्थापनालाई प्राथमिकतामा राख्दै पार्टीको सांगठनिक गतिविधिलाई समेत निर्धारित कार्यतालिकाअनुसार अघि बढाउने निर्णय गरेको हो।
