काठमाडौं । नेकपा एमालेको जारी केन्द्रीय कमिटीको तेस्रो बैठक लम्बिएको छ । बैठकको कार्यसूचीप्रति केही नेताहरूले आपत्ति जनाएपछि निर्धारित समयभन्दा बैठक लम्ब्याउने तयारी गरिएको हो ।
केन्द्रीय कार्यालय स्रोतका अनुसार बैठकको कार्यसूचीलाई अन्तिम रूप दिन बुधबार बिहान सचिवालय बैठक बस्ने भएको छ । सचिवालय बैठकले कार्यसूची अनुमोदन गरेपछि बुधबार दिउँसो १ बजेदेखि केन्द्रीय कमिटी बैठक पुनः सञ्चालन गरिनेछ ।
केन्द्रीय कमिटी बैठकमा प्रस्तुत गरिने विभिन्न प्रतिवेदनमाथि सदस्यहरूलाई धारणा राख्न पर्याप्त समय दिने तयारी गरिएको स्रोतले जनाएको छ । नेताहरूको सुझाव तथा धारणा समेट्दै बैठकलाई बिहीबार बेलुकासम्म समापन गर्ने तयारी एमालेले गरेको छ ।
कार्यसूचीमै नेताहरूबीच असहमति देखिएपछि बैठकको समयतालिका परिवर्तन भएको हो । सचिवालय बैठकपछि केन्द्रीय कमिटीमा प्रस्तुत हुने एजेन्डा र छलफलको कार्यतालिका थप स्पष्ट हुने बताइएको छ ।
