काठमाडौँ । नेपाली कांग्रेसका नेता भीष्मराज आङ्देम्बेले कांग्रेसको १५औँ महाधिवेशन अहिलेसम्मकै ऐतिहासिक महाधिवेशन भएको दाबी गरेका छन्। महाधिवेशनअन्तर्गत बन्दसत्र समापन कार्यक्रममा बोल्दै उनले यसपटक पार्टीको नीति, सिद्धान्त र भावी कार्यदिशामाथि गम्भीर छलफल भएकाले आफूलाई महाधिवेशन नौलो लागेको बताए।
आङ्देम्बेका अनुसार विगतका बन्दसत्रमा नीति, सिद्धान्त र भावी कार्यदिशामाथि पर्याप्त छलफल हुने गरेको आफूले नदेखेको बताए। यसपटकको छलफलले कांग्रेसको नीति र सोचमा समेत परिवर्तन ल्याउने अपेक्षा उनले व्यक्त गरे।
उनले महाधिवेशन उद्घाटन समारोहमा विभिन्न राजनीतिक दलका नेताहरूको सहभागिताले कांग्रेसले मुलुकको राजनीतिक दिशानिर्देशनमा आफ्नो भूमिका प्रस्तुत गरेको दाबी गरे।
आङ्देम्बेले कांग्रेसप्रति सबै उमेर समूहको आकर्षण र भरोसा बढेको दाबीसमेत गरे। विगतमा कांग्रेसलाई ‘बूढोहरूको पार्टी’ भन्ने गरिए पनि अहिले १८ वर्षका युवायुवतीदेखि विभिन्न उमेर समूहका मानिस पार्टीमा जोडिएको उनको भनाइ थियो।
देशको पछिल्लो राजनीतिक अवस्थाप्रति टिप्पणी गर्दै उनले बहुमतको नाममा ‘अल्गोरिदम’बाट सत्तामा आएकाहरूले मुलुकलाई गलत दिशातर्फ लैजान खोजेको आरोप लगाए। उनले कांग्रेसको नयाँ नेतृत्वले देशको राजनीतिक अवस्थालाई सही दिशामा अघि बढाउनुपर्ने बताए।
आङ्देम्बेले महाधिवेशनबाट निर्वाचित हुने नयाँ नेतृत्वले पार्टीलाई नयाँ नीति, सोच र कार्यदिशासहित अघि बढाउनुपर्नेमा जोड दिए। कांग्रेसको आगामी नेतृत्वले महाधिवेशनबाट प्राप्त राजनीतिक म्यान्डेटलाई संगठन सुदृढीकरण र मुलुक निर्माणको दिशामा रूपान्तरण गर्नुपर्ने उनको भनाइ छ।
