काठमाडौं । नेपाली कांग्रेसका वरिष्ठ उपसभापति विश्वप्रकाश शर्माले पार्टीको १५औँ महाधिवेशनमा सभापतिका उम्मेदवार गगन थापाको नाम जोडेर वितरण गरिएको प्यानलगत उम्मेदवार सूची झुटो भएको बताएका छन्।
नेतृत्व चयनका लागि भइरहेको निर्वाचनमा गगन थापाको प्यानल भन्दै उम्मेदवारहरूको सूची महाधिवेशन प्रतिनिधिहरूबीच बाँडिएको चर्चा चलिरहेका बेला शर्माले त्यसको खण्डन गरेका हुन्। उनले आफूहरूले कुनै प्यानलगत सूची तयार गरी वितरण नगरेको स्पष्ट पार्दै त्यस्ता सूचीलाई ‘फेक’को संज्ञा दिएका छन्।
शर्माका अनुसार सभापतिका उम्मेदवार थापा र आफूका लागि केन्द्रीय कार्यसमितिका सबै उम्मेदवार समान छन्। उम्मेदवारहरूलाई प्यानलका आधारमा विभाजन गर्नुपर्ने आवश्यकता नरहेको उनको भनाइ छ।
‘हामीले बनाएको वा पठाएको भनेर प्यानलको चिट बाँडिएको थाहा पाएको छु। ती सबै फेक हुन्। सभापति र मेरा लागि सबै उम्मेदवार साथीहरू समान हुनुहुन्छ। हामीले प्यानल बनाउन आवश्यक छैन,’ शर्माले भनेका छन्।
उनले सभापतिका उम्मेदवार गगन थापाले समेत आफ्नो नाम जोडेर प्रचार गरिएका प्यानलगत सूची झुटो भएको बताइसकेको उल्लेख गरेका छन्।
महाधिवेशनमा मतदान भइरहेका बेला शर्माले प्रतिनिधिहरूलाई विशेष महाधिवेशनको पक्ष वा विपक्षका आधारमा उम्मेदवार छनोट नगर्नसमेत आग्रह गरेका छन्। पार्टीभित्रको आन्तरिक मतभेदलाई निर्वाचनको आधार बनाउनुभन्दा उम्मेदवारको क्षमता र योगदानलाई प्राथमिकता दिनुपर्ने उनको सन्देश छ।
‘जो साथीहरूले जिते पनि सबै समान हुनुहुन्छ। महाधिवेशन प्रतिनिधिहरूले मत दिँदा विशेष महाधिवेशनको पक्ष वा विपक्ष छुट्याएर दिनुहुन्न,’ शर्माले भनेका छन्।
कांग्रेसको १५औँ महाधिवेशनमा नयाँ नेतृत्व चयनका लागि मतदान भइरहेका बेला प्यानलगत सूचीबारे उठेको विवादले निर्वाचनको माहोल थप चर्चामा आएको छ। शर्माको अभिव्यक्तिले उम्मेदवारलाई गुट वा प्यानलका आधारमा नभई स्वतन्त्र रूपमा मूल्यांकन गरेर मतदान गर्नुपर्ने सन्देश दिएको छ।
