ललितपुर । नेपाली कांग्रेसका नवनिर्वाचित सभापति गगनकुमार थापाले आज फूलपातीको अवसरमा शपथग्रहण गर्दै औपचारिक रूपमा पार्टीको नेतृत्व सम्हाल्ने भएका छन् ।
नेपाली कांग्रेस केन्द्रीय कार्यालयका अनुसार थापाको शपथग्रहण तथा पदबहाली समारोह आज दिउँसो २ बजे पार्टी केन्द्रीय कार्यालयमा आयोजना हुनेछ । १५औँ महाधिवेशनबाट सभापतिमा निर्वाचित भएपछि उनको औपचारिक पदबहालीका लागि कार्यक्रम तय गरिएको हो ।
समारोहमा सहभागी हुन उपत्यकामा रहेका पार्टीका नेता, कार्यकर्ता तथा सञ्चारकर्मीलाई निमन्त्रणा गरिएको कांग्रेसका कार्यवाहक मुख्यसचिव कृष्णप्रसाद दुलालले जानकारी दिएका छन् ।
कांग्रेसले केन्द्रीय समितिका अन्य पदाधिकारी तथा सदस्यहरूको शपथग्रहण भने दसैँपछि गर्ने जनाएको छ । महाधिवेशनबाट २३१ सदस्यीय केन्द्रीय समिति निर्वाचित भएको छ ।
फूलपातीको अवसरमा हुन लागेको थापाको शपथग्रहणलाई कांग्रेसको नयाँ नेतृत्वले औपचारिक रूपमा जिम्मेवारी सम्हाल्ने महत्त्वपूर्ण घटनाका रूपमा हेरिएको छ ।
