काठमाडौँ । नेपाली कांग्रेसका वरिष्ठ उपसभापति विश्वप्रकाश शर्माले आगामी दशकलाई सामाजिक रूपान्तरणको दशकका रूपमा अघि बढाउन पार्टीले विशेष प्राथमिकताका साथ काम गर्नुपर्ने बताएका छन्। सामाजिक विकृति, विभेद र गलत प्रवृत्तिको अन्त्य गर्दै जनताले अनुभूति गर्ने परिवर्तनका लागि कांग्रेस केन्द्रित हुनुपर्ने उनको जोड छ।
पार्टी मुख्यालय सानेपामा आयोजित १५औँ महाधिवेशनबाट निर्वाचित पदाधिकारी तथा केन्द्रीय सदस्यहरूको शपथ ग्रहण समारोहलाई सम्बोधन गर्दै शर्माले नवनिर्वाचित नेतृत्वलाई परिणाममुखी काममा ध्यान दिन आग्रह गरे। पार्टी केन्द्रको स्पष्ट नीति र सभापतिको कार्ययोजनाअनुसार जिम्मेवारीपूर्वक काम गर्न सके मात्रै जनतामा सकारात्मक सन्देश प्रवाह हुने उनको भनाइ थियो।
डिजिटल युगमा सामाजिक सञ्जालको बढ्दो प्रभावबारे चर्चा गर्दै शर्माले गलत सूचना र भ्रामक प्रचारको खण्डन विधिसम्मत तथा तथ्यमा आधारित ढङ्गले गर्नुपर्ने बताए। सामाजिक सञ्जाललाई द्वेष र विभाजन फैलाउने माध्यम नभई सामाजिक रूपान्तरण, जनचेतना अभिवृद्धि र सकारात्मक परिवर्तनको साधन बनाउनुपर्नेमा उनले जोड दिए।
शर्माले पार्टीको स्वार्थभन्दा माथि उठेर राष्ट्रलाई सर्वोपरि राख्नुपर्ने धारणा पनि राखे। जलवायु परिवर्तनका गम्भीर असर न्यूनीकरण, हिमाल संरक्षण तथा विदेशमा रहेका नेपालीका भावना र समस्या सम्बोधन गर्ने विषयमा कांग्रेस सरकारसँग पूर्ण सहकार्य गर्न तयार रहेको उनले स्पष्ट पारे।
उनको भनाइले कांग्रेसको आगामी कार्यदिशामा सामाजिक रूपान्तरण, जिम्मेवार राजनीतिक अभ्यास, डिजिटल माध्यमको सदुपयोग र राष्ट्रिय मुद्दामा सहकार्यलाई प्राथमिकता दिनुपर्ने सन्देश दिएको छ।
