बुटवल । चरम आर्थिकमन्दी, बैंकको चर्को ब्याजदर र लोडसेडिङ जस्ता कारणले रुपन्देहीका २ सय १७ वटा उद्योगहरुमा ताला लागेको छ । एकबर्षको अवधिमा २ सयमाथि उद्योगहरु बन्द हुँदा त्यहाँ कार्यरत कर्मचारीहरु बेरोजगार हुन पुगेका छन्,। स्वदेशी उद्योगबाट उत्पादित वस्तुहरु बन्द भएपछि आयातित वस्तुहरुमा महङ्गी भएको उपभोक्ताहरुको गुनासो छ । घरेलु तथा साना उद्योग कार्यालय भैरहवाका अनुसार बन्द भएका उद्योगहरु सबै साना उद्योगहरु रहेको बताएको छ।
घरेलु तथा साना उद्योग कार्यालय भैरहवाका सूचना अधिकारी नेत्रप्रसाद भुसालले गत आर्थिक वर्ष २०७९/०८० मा उत्पादनमूलक उद्योग ८४, पर्यटन उद्योग ५१ वटा, कृषि तथा वनजन्य उद्योग १९ र सेवामूलक उद्योग ६३ बन्द भएको बताउनुभयो । घरेलु कार्यालय अन्तर्गत करिब १ हजार ३० वटा साना उद्योग दर्ता भएको उल्लेख छ।
रुपन्देही उद्योग सङ्घका अध्यक्ष माधव पौडेलका अनुसार औद्योगिक क्षेत्रका रुपमा विपसित हुँदै गएको रुपन्देहीमा एक वर्षमै २ सयभन्दा धेरै उद्योगहरु बन्द हुँदै जाँदा आर्थिक क्षेत्रमा चरम मन्दी र लोडसेडिङ समस्याले धरासायी बनेको जनाउनुभयो।
नागरिकहरुका अनुसार आर्थिक क्षेत्रलाई जोगाउन सरकारले अस्पष्ट नीति ल्याउन नसक्दा साना उद्योगहरु विस्थापित हुँदै गएको र ती उद्योग चलाउने जनशक्तिहरु विदेश पलायन हुन बाध्य भएको बताउँछन् । उनीहरु भन्छन्, आर्थिक मन्दी, चर्काे ब्याजदर र अनियमित लोडसेडिङ्गका कारण साना उद्योगहरु विस्थापित हुँदै गएका छन् ।
उद्योग वाणिज्य महासङ्घका केन्द्रीय सदस्य तथा बुटवल उद्योग वाणिज्य सङ्घका अध्यक्ष उज्ज्वल कसजुले भने रुपन्देहीमा सेवामूलक उद्योग बन्द हुनुमा विमानस्थल पूर्णरुपमा सञ्चालन हुन नसक्नु, बैंकबाट ल्याएको ऋणको ब्याज र खस्किदै गएको बजारीकरणले ठूला उद्योगहरु पनि निकै अप्ठ्यारोमा पर्दै गएको बताउनुभयो।
