गुल्मी । लगातार परेको बर्षाका कारण  गुल्मीको कालीगण्डकी करिडोर खण्डको हर्मिचौर देखि अर्वेनी सडक खण्डको ठूलाखोलामा सडक अवरुद्ध भएको छ । सडक माथिबाट पहिरो खसेपछि सडक अवरुद्ध भएको जिल्ला प्रहरी कार्यालय गुल्मीका प्रहरी नायब उपरीक्षक डिल्लीनारायण पाण्डेले जानकारी दिनुभयो ।

प्रहरी नायब उपरीक्षक पाण्डेले आइतबार बिहान ११ बजे जिल्लाको कालीगण्डकी गाउँपालिका–१ हर्मिचौरदेखि अर्वेनी सडक खण्डको ठूलाखोलामा सडक माथिबाट ढुङ्गासहितको पहिरो खसेपछि कालिगण्डकी करिडोर सडक अवरुद्ध भएको बताउनुभयो ।

पहिरो पन्छाउनका लागि तीन वटा एक्स्काभेटर प्रयोग भैरहेको जानकारी प्रहरी नायव उपरीक्षक पाण्डेले दिनु भयो । उक्त स्थानमा प्रहरी चौकी पुर्तिघाटनबाट प्रहरी सहायक निरीक्षक लोकमान ताम्राकारको कमाण्डमा प्रहरी टोली परिचालन गरिएको र पहिरोमा ठूलो ढुङ्गा रहेको र माथिबाट ढुङ्गा खस्नेक्रम जारी रहेकोले सडक पूर्ण रूपमा अवरुद्ध भएकोले खुल्न केही समय लाग्ने प्रनाउ पाण्डेले बताउनु भयो।