काठमाडौँ । अर्थमन्त्री डा. प्रकाशशरण महतले बदिलदो परिस्थितिअनुसार आम जनताको चासो र चिन्तालाई मध्यनजर राखेर सक्रिय हुन भन्सारका कर्मचारीहरुलाई निर्देशन दिनुभएको छ ।
आइतबार भन्सार बिभागले काठमाडौंमा आयोजना गरेको भन्सार व्यवस्थापन गोष्ठीमा बोल्दै मन्त्री डा. महतले सबैभन्दा पहिला कर्मचारीको सोचमा परिवर्तन आउन जरुरी रहेको भन्दै आम जनताको चासो र चिन्तालाई मध्यनजर राखेर सक्रिय हुन भन्सारका कर्मचारीहरुलाई निर्देशन दिनुभएको हो ।
आयतकर्ता र करदाताहरुलाई अप्ठ्यारोमा पारेर व्यक्तिगत फाइदाका लागि कर्मचारीले बार्गेनिङ गर्न नहुने उहाले बताउनुभयो । उहाले भन्सारका प्रत्येक कार्यालयको कार्ययोजना माग गर्दै लक्ष्य अनुसारको राजस्व संकलनका लागि गम्भीर हुनुपर्ने धारणा राख्नुभयो ।
मन्त्री महतले अहिलेको परिस्थितिमा आर्थिक गतिविधि बढ्नुपर्ने र जिम्मेवार भएर काम गरे लक्ष्यभन्दा बढी पनि राजस्व उठाउन सक्ने उल्लेख गर्नुभयो ।
