रेशम कुँवर,गुल्मी । अरिङ्गालको टोकाइबाट मुसिकोट नगरपालिका -४ कालढुङ्गा बस्ने एक युवकको ज्यान गएको छ।
सोमबार साँझ करिब ६ बजे मुसिकोट नगरपालिका -३ मा रहेको देविस्थान सामुदायिक जंगलको सल्लाको बोटमा रहेको अरिङ्गालको गोला पोल्ने क्रममा घाइते भएका सोही नगरपालिका -४ कालढुङ्गा बस्ने २१ बर्षका शैलेस सि.ठकुरीको गुल्मी अस्पतालमा उपचारको क्रममा मृत्यु भएको जानकारी जिल्ला प्रहरी कार्यालय गुल्मीका प्रहरी नायव उपरीक्षक डिल्लिनारायण पाण्डेले दिनुभएको छ।
अरिङ्गाल पोल्ने क्रममा घाइते भएका ठकुरी सोमबार साँझ घरमा आइ कसैलाई जानकारी नदिइ सुतेको र आज बिहान आमा र दाइले घाइते अवस्थामा देखेपछि उपचारका लागि गुल्मी अस्पतालमा ल्याएकोमा उपचारको क्रममा निजको मृत्यु भएको जानकारी प्रहरीले दिएको छ।
घटनाका सम्बन्धमा जिल्ला प्रहरी कार्यालय र प्रहरी चौकीबाट थप आवश्यक अनुसन्धानका लागि प्रहरी टोलि खटाइएको प्रहरी नायब उपरीक्षक पाण्डे बताउनु भयो।
