सागर महत,अर्घाखाँची । जिल्ला अदालत अर्घाखाँचीमा आर्थिक वर्ष २०७९/८० मा सम्बन्ध बिच्छेदका २ सय ७३ मुद्दा दर्ता भएका छन । जसमध्ये १ सय ५९ मुद्दा फैसला भएको कार्यालयका सुचना अधिकारी टेकराज गैरेले बताउनुभयो । अब १ सय १४ मुद्दा फैसला हुन बाँकी रहेको उहाँको भनाई छ ।
यस अघि अधिकांश महिलाहरु सम्बन्ध बिच्छेदका मुद्दा दर्ता गर्न आउने गरेकोमा अहिले पुरुष पनि सम्बन्ध बिच्छेदको लागि आउने गरेको छन । आर्थिक वर्ष २०७९/०८० मा पुरुषले मात्र ५५ मुद्दा दर्ता गराएको उहाँले बताउनुभयो । यस्तै जिल्ला अदालतमा लक्ष्य भन्दा कम मुद्दा फैसला भएका छन ।
आर्थिक वर्ष २०७८/७९ मा जिम्मेवारी आएका १ सय २६ थान मुद्दा र २०७९/८० मा ४ सय १ गरि कुल ५ सय २७ मुद्दा दर्ता भएकोमा ३ सय १८ थान अर्थात ६५ प्रतिशत मुद्दा फर्छ्यौट गर्ने वार्षिक लक्ष्य राखिएकोमा २ सय ५१ थान अर्थात ४७।६३ प्रतिशत मात्र मुद्दा फैसला भएको सुचना अधिकारी गैरेले बताउनुभएको छ।
पुर्व न्यायाधीश श्रीकृष्ण भट्टराईले घर विदालिए पछि असार ११ गतेदेखि राजिनामा दिएको समयमा न्यायाधीश नतोक्दा मुद्दा फर्छ्यौटमा कमी आएको जिल्ला अदालत अर्घाखाँचीले जनाएको छ ।
