राेल्पा । लुंग्री गाउँपालिकाले बिना कारण पाँच जना कर्मचारीहरुलाई हटाएको भन्दै नेपाली कांग्रेस लुंग्री गाउँपालिकाले ध्यानाकर्षण पत्र बुझाएको छ।केहि कर्मचारीहरुले पाउँदै आएको तलवमा समेत कटौति गरेको र अन्य पालिकाको गतिविधिमा आपत्ती जनाउदै नेपाली कांग्रेस लुंग्री गाँउपालिका कार्यसमितिले गाँउपालिका अध्यक्ष भरत कुमार थापालाई मंगलबार ध्यानाकर्षण पत्र बुझाएको हो।
उद्यम विकाश सहजकर्ता धनमला गुरुङ र जानकी माँझी,स्वास्थ्यकर्मी स्मृति के.सी र बेगमबहादुर रोका,पोषण सहजकर्ता डोरबहादुर खड्कालाई गाउँपालिकाले हटाएको ध्यानाकर्षण पत्रमा उल्लेख गरिएको छ।उनीहरुले उक्त निर्णय तत्काल हेरफेर गर्न समेत ध्यानाकर्षण पत्र मार्फत गाउँपालिकालाई आग्रह गरेका छन्।
साउन २१ गतेको कार्यपालिकाको बैठकको निर्णयमा नियोजित तरिकाले हटाएको भन्दै आफूहरुले पहिलो चरणमा उक्त निर्णय तत्काल सच्याउनको लागि गाँउपालिका अध्यक्ष थापालाई ध्यानाकर्षण पत्र मार्फत जानकारी गराएको नेपाली कांग्रेस लुंग्री गाउँपालिकाका सभापति जनक खड्काले जानकारी दिनुभयो।
आफुहरुले असहमति जनाएको निर्णयमा गाँउपालिकाले २०८० भाद्र १ गते सम्म नसच्याए उक्त निर्णय विरुद्ध चरणबद्ध रुपमा आन्दोलनको घोषणा गर्ने समेत चेतावनी दिएका छन् । राजनितिक पूर्वाग्रह राखी कर्मचारीहरु हटाएको र केहि कर्मचारीहरुले पाउँदै आएको सेवा सुबिधालाई पनि कटौती गरि दिएको एक कर्मचारीले जानकारी दिनुभयो।
कुनै शाखामा आवश्यकता भन्दा पनि बढी कर्मचारीहरु राखिएको छ-ती कर्मचारीले भन्नुभयो।राजनीतिक पूर्वाग्रह गरी बिना कारण कर्मचारीहरुलाई हटाउनु नियोजीत भएको गाउँपालिकालाई ध्यानाकर्षण पत्रमा आरोप लगाइएको छ।
लुंग्री गाउँपालिकाले हटाएका कर्मचारीहरुको माग सम्बोधन गर्छ कि गर्दैन त्यो भने हेर्न बाँकी छ।
