भक्तपुर । अर्थमन्त्री डा. प्रकाशशरण महतले, गणेशमान सिंहजस्ता व्यक्तित्वहरुको योगदानले देशमा लोकतान्त्रिक संविधान स्थापना सम्भव भएको बताउनुभएको छ ।
आज भक्तपुरमा आयोजित गणेशमान सिंहको प्रतिमा अनावरण समारोहमा उहाँले देशमा लोकतान्त्रिक अधिकार र कानूनी शासन स्थापनाको लागि गणेशमान सिंहको योगदान अतुलनिय भएको भन्दै आउने पिढीले पनि त्यसलाई प्रेरणाको रुपमा लिनुपर्ने बताउनुभयो ।
उहाँले भन्नुभयो, ‘यो देशमा लोकतान्त्रिक अधिकार र कानूनी शासन स्थापनाको लागि गणेशमान सिंहको योगदान अतुलनीय छ । अनेक चुनौतीहरु भोग्दै हामीले समावेशि लोकतान्त्रिक संविधान स्थापित गरेका छौँ । त्यो गणेशमान सिंह जस्तो व्यक्तित्वहरुको योगदानले सम्भव भएको हो । उहाँहरुबाट प्रेरणा लिएर अगाडि बढ्नु पर्छ र आउने पिढीलाई पनि त्यो योगदानलाई नभुल्न र सिंहले दिएको सन्देशलाई जान्न र बुझ्न प्रेरित गरिराख्नु पर्छ ।’
यस्तै, उहाँले केन्द्र, स्थानिय र प्रदेश सरकारको सहभागितामा पार्क निमार्णको काम पूरा गर्न सकिन्छ भन्ने विश्वास पनि व्यक्त गर्नुभएको छ । समग्र सरकारको तर्फबाट सुशासन, लोकतान्त्रिक मूल्य र मान्यतालाई स्थापना गर्न र सिंहले देखाएको बाटोमा लाग्न सरकार प्रतिबद्ध रहेको पनि उहाँको भनाई छ ।
