काठमाडौँ । नेपाल उद्योग वाणिज्य महासंघका अध्यक्ष चन्द्रप्रसाद ढकालले प्रक्रिया पूरा भएर पनि रोकिएका कम्पनीका आइपिओ निष्कासन रोक्न नहुने बताउनुभएको छ ।
बुधबार इकोनोमिक मिडिया एसोसिएसन नेपाल (इमान)ले काठमाडौँमा आयोजना गरेको अन्तरक्रियामा ढकालले धितोपत्र बोर्डको अध्यक्ष नभएकै कारण प्रक्रिया पूरा भइसकेका कम्पनीको आइपिओ निष्कासन रोक्न नहुनेमा जोड दिनुभयो ।
२५ देखि ३० वटासम्म कम्पनी नियमित आईपीओमा लैजान लाइनमा रहेको भन्दै ढकालले ती कम्पनीका आइपियो निष्कासन गर्न दिनुपर्ने बताउनुभयो ।
ढकालले भन्नुभयो, ‘माननीय अर्थमन्त्री ज्यु करिब २५ देखि ३० वटा कम्पनीहरू जुन रेगुलर आईपीयोमा लग्नको लागि लाइनमा छन् । त्यो धेरै महिनादेखि रोकिएको छ ।
ती कम्पनीले प्रक्रिया पुर्याएर एउटा चिठीको लागि कुरेर बसेका छन् । प्रक्रिया पूरा भएको र प्रक्रिया पूरा गर्ने अन्तिम चरणमा पुगेका कम्पनीलाई आइपिओ निष्कासन गर्न दिनुपर्छ भन्ने कुरा निजी क्षेत्रको तर्फबाट राख्छु।
’उहाँले प्रिमियममा दिनुपर्ने र गम्भीर प्रकृतिका बाहेक प्रक्रिया पूरा गरिसकेका कम्पनीका आइपिओ निष्कासन गर्न दिनुपर्ने बताउनुभएको हो । बोर्डको अध्यक्षको कारणले प्रक्रिया पुर्याएका कम्पनीलाई रोक्न नहुनेमा उहाँले जोड दिनुभयो ।
