सुनसरी - सुनसरीबाट १ करोड १ लाख रुपैयाँ बरामद भएको छ । सशस्त्र प्रहरी शनिबार राति उक्त रकम बरामद गरेको हो ।
सुनसरीको हरिनगर गाउँपालिका- ५ दुर्गा मन्दिरस्थित सशस्त्र प्रहरी बल नेपाल बोर्डर आउट पोष्ट बसन्तपुरको चेकप्वाइन्ट टोलीले उक्त रकम बरामद गरेको हो ।
घुस्की नाकाबाट हरिनगरतर्फ जाँदै गरेको बा १६ च ७६१३ नम्बरको कारलाई शंका लागि जाँच गर्दा कारभित्र बोरामा लुकाइछिपाइ राखेको सो रकम बरामद भएको सशस्त्र प्रहरीका सह प्रवक्ता डीएसपी शैलेन्द्र थापाले जानकारी दिए ।
बरामद भएको रकममा १ हजार दरको नोट ९ हजार ७ सय थान (९७ लाख) र ५ सय दरको ८ सय थान (४ लाख) रहेको थापाले जानकारी दिए ।
रकमसँगै कार र चालक सुनसरी जिल्ला हरिनगर गाँउपालिका- ५ बस्ने अन्दाजी ३७ वर्षीय ईसा अन्सारीलाई समेत नियन्त्रणमा लिइएको थापाले जानकारी दिए ।
प्रारम्भिक सोधपुछमा उनले सो रकमको स्रोत खुलाउन नसकेको थापाको भनाइ छ । नगद रकम, कार र चालकलाई आवश्यक अनुसन्धान तथा कारबाहीका लागि रजाश्व अनुसन्धान कार्यालय इटहरीमा बुझाइने थापाको भनाइ छ ।
