काठमाडौँ । नेपाली चलचित्रका नायक निखिल उप्रेतीले गणतन्त्र दिवस–२०८१ को अवसर पारेर राष्ट्रिय समाचार समिति(रासस) ले आयोजना गरेको ‘गणतन्त्रका उपलब्धि : समृद्धिका लागि पूर्वाधार’ शीर्षकको तस्बिर प्रदर्शनीको आज यहाँ अवलोकन गर्नुभएको छ ।
प्रदर्शनी अवलोकनपछि उहाँले भन्नुभयो, “गणतन्त्रपछि भौतिक विकासबारे तस्बिरमा एकै ठाउँमा हेर्न पाउनु हामी सबैका लागि अवसर हो, पछिल्लो समयमा विकास भएन भनेर विरोध मात्रै भइरहेको अवस्थामा यसबीचमा भएका प्रगति र विकासबारे सबैले जान्नुपर्ने जरुरी छ ।”
मुलुकमा विकास नै भएन भनेर निराश हुनुभन्दा पनि भएको विकासबाट सन्तुष्टि लिँदै थप विकासका लागि पहल गर्नुपर्ने नायक उप्रेतीको भनाइ थियो ।
नायक उप्रेतीलाई राससका कार्यकारी अध्यक्ष धर्मेन्द्र झा, महाप्रबन्धक सिद्धराज राई, नायब महाप्रबन्धक श्यामप्रसाद रिमाल, प्रधान सम्पादक उत्तम सिल्वाललगायतले प्रदर्शनीमा राखिएका तस्बिरका बारेमा जानकारी गराउनुभएको थियो ।
गत जेठ १० गतेदेखि सुरु भएको प्रदर्शनीमा मुलुकका तीनवटै तहका सरकारले आफ्नो सीप, जनशक्ति र पुँजी तथा छिमेकीका साथै अन्य मित्रराष्ट्रसमेतका सहायतामा निर्मित्त एवं निर्माणाधीन राष्ट्रिय तथा प्रादेशिक गौरवका आयोजनाका तस्बिर समावेश छन् ।
विसं २०७२ को ‘गोरखा भूकम्प’बाट भत्किएका ऐतिहासिक धरोहरको पुनःनिर्माणपछिका संरचना, मानवीय विकास, शिक्षा, स्वास्थ्य, उद्योग, सडक, सिँचाइ, खानेपानी, विद्युत् उत्पादनलगायत विषयमा सङ्कलन गरी राससबाट सम्प्रेषित तस्बिर प्रदर्शनीमा राखिएका छन् ।
सातवटै प्रदेशमा निर्माण भएका भौतिक पूर्वाधारसम्बन्धी ९५ तस्बिर प्रदर्शनीमा समेटिएका छन् । राससले गत वर्ष गणतन्त्र दिवसका अवसरमा ‘हाम्रो संस्कृति : हाम्रो सम्पदा’ शीर्षकमा तस्बिर प्रदर्शनी गरेको थियो ।
प्रदर्शनीमा ऊर्जा, विमानस्थल, पर्यटन, बाटोघाटो, सडक, पुल, स्वास्थ्य, शिक्षाका संरचना, सम्पदा पुनःनिर्माण, तराईका हुलाकी मार्ग, मूलपानी क्रिकेट मैदान, काठमाडौँ–मधेस दू्रतमार्ग, थानकोट–नागढुङ्गा सुरुङमार्ग, सुनकोशी–मरिन डाइभर्सन बहुद्देश्यीय आयोजना, सौर्य प्यानल, टेलिफोनका फोरजी टावर, एकीकृत बस्ती, राष्ट्रिय गौरव, प्रदेश गौरवका आयोजनालगायत तस्बिर समावेश छन् ।
यसअघि पूर्वराष्ट्रपति, उपप्रधानमन्त्री तथा मन्त्रीहरु, पूर्वमन्त्रीहरु र विभिन्न राजनीतिक दलका नेतालगायतले तस्बिर प्रदर्शनीको अवलोकन गरिसक्नुभएको छ ।
